Así se ven as cicatrices que deixan os incendios do Courel, Valdeorras e o Invernadeiro

Todos os lumes forestais están controlados ou estabilizados, pero xa deixan máis de 30.000 hectáreas queimadas segundo Medio Rural

Imaxes de satálite da superficie queimada nos tres grandes incendios de Galicia da última semana. Arriba, o do Courel. Á dereita, o de Valdeorras. Abaixo, o do Invernadeiro. Crédito: Sentinel-2
Imaxes de satálite da superficie queimada nos tres grandes incendios de Galicia da última semana. Arriba, o do Courel. Á dereita, o de Valdeorras. Abaixo, o do Invernadeiro. Crédito: Sentinel-2

Máis de dez días despois, a situación comeza a mellorar. Segundo a última actualización da Consellería de Medio Rural, todos os incendios forestais que devastaron parte de Galicia están controlados e estabilizados. Con todo, o reconto final dá conta das dimensións que alcanzaron os lumes, considerados xa os peores da historia do país dende que hai rexistros. A estimación sitúase nas máis de 30.000 hectáreas arrasadas, cos focos principais en tres zonas ben delimitadas.

Por unha parte, o incendio do Courel, o que deixa máis superficie queimada, con 11.100 hectáreas calcinadas. Segundo trasladan dende a Xunta, xuntáronse cinco lumes, dous na parroquia de Vilamor, outro na de Seceda e outros dous na de Saa, afectando principalmente aos concellos do Folgoso do Courel e da Pobra do Brollón.

En segundo lugar, o de Valdeorras, que tamén afectou o Parque Natural da Serra da Enciña de Lastra, deixando 10.500 hectáreas queimadas. Por último, o de Vilariño de Conso, que afectou o parque do Invernadeiro, calcinando 6.500 hectáreas. Nas seguintes imaxes de satélite pódense ver as fondas cicatrices que deixaron os lumes nestes tres puntos, segundo a misión Sentinel-2 vencellada ao programa Copernicus:

  • Superficie queimada no incendio do Courel. Crédito: Sentinel-2
  • Superficie queimada no incendio do Invernadeiro. Crédito: Sentinel-2
  • Superficie queimada no incendio de Valdeorras. Crédito: Sentinel-2

Amais destes tres grandes incendios, Medio Rural informa doutros dous lumes. O de Quiroga, en Lugo, tamén está controlado. Iniciouse na parroquia de Outeiro e deixa 250 hectáreas queimadas. O último que se notifica é o de Oímbra, que entrou dende Portugal. Extinguiuse onte, luns 25 de xullo, ás 22.43 horas, pero xa arrasou con 2.100 hectáreas.

A orixe está nos raios

Comprender o desastre incendiario en Galicia non é doado. Son moitos os factores que confluíron e desencaderon unha situación sen precedentes. Segundo contaba a GCiencia o experto en lumes forestais e director da Escola de Enxeñaría de Pontevedra, Juan Picos, un dos trazos máis característicos destes incendios é a súa orixe natural. É dicir, todos eles se derivaron dos máis de 6.000 raios que caeron sobre Galicia a noite do xoves 14 de xullo, a raíz dunha tormenta explosiva que sacudiu o país. Isto provocou que moitos lumes apareceran en zonas afastadas, complicando aínda máis os labores de extinción.

Amais disto, outras circunstancias que prexudicaron gravemente a situación vivida a semana pasada no Courel, Valdeorras e O Invernadeiro foron as condicións climatolóxicas. As altas temperaturas pero, sobre todo, os baixos niveis de humidade, provocaron que os incendios atoparan unha gran cantidade de combustible e se puideran propagar moi rápido. Polo tanto, o estrés hídrico que está a sufrir Galicia tan só foi un estímulo máis que contribuíu a empeorar a situación.

Por último, o abandono rural é un factor importante á hora de falar de incendios forestais. Como indicaba Picos, a baixada de poboación e a dispersión das aldeas non mellorou a situación, senón que a complicou. De igual modo, salientaba a dificultade de traballar nese tipo de terreo a causa do relevo, que facía que o tránsito fose moi difícil para as brigadas de extinción. “Un evento singular e pouco frecuente en Galicia”, concluía o investigador.

DEIXAR UNHA RESPOSTA

Please enter your comment!
POLÍTICA DE COMENTARIOS:

GCiencia non publicará comentarios ofensivos, que non sexan respectuosos ou que conteñan expresións discriminatorias, difamatorias ou contrarias á lexislación vixente.

GCiencia no publicará comentarios ofensivos, que no sean respetuosos o que contentan expresiones discriminatorias, difamatorias o contrarias a la ley existente.

Please enter your name here

Este sitio emprega Akismet para reducir o spam. Aprende como se procesan os datos dos teus comentarios.