No peor dos escenarios, lugares de Galicia como as Salinas de Samil, as dunas de Corrubedo ou a Enseada de Mera estarán baixo o nivel do mar en 2050. Así o reflicte un mapa interactivo creado pola organización Climate Central, un grupo independente de científicos e comunicadores que alertan sobre as consecuencias do cambio climático e como afectará á vida das persoas. A ferramenta permite ver as áreas da costa galega que se verán afectadas pola subida do nivel do mar ata o ano 2150, no que concellos como O Grove pasarían a ser unha illa ou a praia de Carnota deixaría de existir.
O mapa interactivo, baseado en “publicacións científicas de rigor”, mostra as áreas máis vulnerables ao aumento do nivel do mar se se mantén o actual nivel de contaminación de gases e o ritmo dos desxeos dos polos. A ferramenta permite poder axustar parámetros como os anos, a traxectoria da contaminación ou a “sorte”. Esta última ten en conta o nivel dos efectos que poida ter o quecemento global. Aínda que é unha páxina feita por científicos, a fidelidade dos seus mapas non ten unha precisión absoluta, xa que fala de previsións.
Así, a costa galega en 2050, nun panorama “medio” de sorte, veríase especialmente afectada en concellos como A Guarda, Gondomar, O Grove, Cambados, Corrubedo, Pontecesures, Carnota, Betanzos ou Ortigueira entre outros. Se a evolución se mantén así, a conexión terrestre entre O Grove e Sanxenxo quedaría baixo o nivel do mar en case toda a súa extensión de cara a 2100. Se se avanza 50 anos máis, este concello pasaría a ser unha illa.
Adeus ás illas fronteirizas do río Miño
As Rías Baixas son as máis afectadas nesta proxección de Climate Central, especialmente a desembocadura do río Miño, onde o nivel do mar para 2100 aumentaría ata cubrir as illas da Xunqueira, Morraceira do Grilo e Morraceira das Varandas. Tamén o concello de Vigo perdería algunhas das súas zonas costeiras máis características como o porto para este ano.
Por outra banda, a subida do nivel do mar de cara a 2150 deixaría as ribeiras do Ulla baixo a agua, afectando a concellos como Catoria, Valga, Rianxo, Dodro, Pontecesures e Padrón. Ademais, se se emprega a peor das “sortes” no mapa, este reflicte que a Illa de Arousa quedaría redicida case a metade e a ría de Ortigueira vería desaparecer boa parte do seu terreo.
