As mordeduras de can poden ser ata un 11% máis frecuentes nos días máis calorosos e solleiros, e cando os niveis de contaminación atmosférica son máis altos, segundo suxire un artigo publicado en Scientific Reports. Con todo, os autores advirten de que se necesitan máis datos e estudos para confirmar estas conclusións.
Investigacións anteriores documentaron que un tempo máis caloroso e uns niveis máis altos de contaminación atmosférica poden asociarse a un aumento da agresividade en humanos, monos Rhesus, ratas e ratos. Con todo, non está claro se esta conduta dos cans contra os humanos tamén segue esta tendencia.
Clas Linnman, do Hospital de Rehabilitación Spaulding (Boston, Estados Unidos) e o seu equipo examinaron datos sobre mordeduras de can en oito cidades estadounidenses —Dallas, Houston, Baltimore, Baton Rouge, Chicago, Louisville, Los Ángeles e Nova York— entre 2009 e 2018. Os datos extraéronse de repositorios de acceso público rexistrados polas autoridades de control animal ou baseáronse en recompilacións anteriores de mordeduras de can.
Os altos índices de radiación ultravioleta incrementaron as mordeduras caninas ata un 11%
A investigación incluíu 69.525 mordeduras rexistradas, unha media de tres mordeduras por día durante 10 anos. Os autores examinaron a súa relación cos niveis diarios de partículas finas, o ozono e as temperaturas. Ademais, avaliaron a radiación ultravioleta (UV) e as precipitacións.
A incidencia de mordeduras caninas aumentou un 11% nos días cun índice UV superior, un 4% con temperaturas máis altas e un 3% nos días con maiores niveis de ozono. Pola contra, diminuíu lixeiramente (nun 1%) nos días con máis precipitacións. Os autores non informaron de cambios na incidencia de mordeduras de can en días con niveis máis altos de partículas finas.
Os rexistros de mordeduras de can non incluían información sobre outros factores que poden afectar a este risco, como a raza, o sexo ou se o can fora castrado ou esterilizado. Ademais, non se dispoñía de información sobre interaccións previas entre o can e a vítima da mordedura, por exemplo se o individuo estaba familiarizado co can.
Os científicos conclúen que estes resultados parecen ampliar a asociación entre temperaturas máis altas e niveis de contaminación atmosférica con agresións entre especies para incluír aos cans. Con todo, necesítanse ampliar a investigación para confirmar e explorar esta relación.
Referencia: The risk of being bitten by a dog is higher on hot, sunny, and smoggy days (Publicado en Scientific Reports)
