Únete á nosa canle de Whatsapp
Moito ollo a partir da tarde do martes á situación meteorolóxica. A combinación dunha potente fronte asociada a unha borrasca (que a Aemet acaba de bautizar como Laura) procedente do Atlántico e un río atmosférico que transporta unha gran carga de humidade deixará notables cifras de precipitacións, sobre todo no oeste de Galicia.
Así, MeteoGalicia activou xa o aviso amarelo por Laura a partir das 15 horas do martes por acumulados de precipitación nunha hora (ata 15 litros) e 12 horas (ata 40 litros) en moitas comarcas do país. Ademais, o nivel será laranxa por ventos na montaña de Ourense, onde se poderían superar os 100 km/h e amarelo no resto de Galicia, agás no noroeste de Ourense e o sur de Lugo. E na costa, o forte vento no mar obrigou á Xunta a decretar a alerta laranxa. A situación de aviso amarelo por vento e chuvia asociados a Laura prolongarase ata o mércores.
O río atmosférico
Un río atmosférico é unha masa de aire moi húmido, con grandes cantidades de auga precipitable nas capas altas da atmosfera, que pode chegar a ter milleiros de quilómetros de longo e poucos centos de quilómetros de ancho, que cruza o Atlántico desde as latitudes tropicais ata a costa europea.
Este fenómeno, estudado en profundidade desde hai anos por expertos galegos de MeteoGalicia e a USC, ten unha grande importancia para a climatoloxía debido á gran achega de humidade que trae consigo. Así, os traballos realizados neste senso polos investigadores galegos tiveron un importante impacto internacional.
