A borrasca ex Danielle, froito do furacán que mantivo atentos sos servizos de meteoroloxía das últimas semanas, segue a sorprender. Primeiro foi considerada un “fenómeno anómalo” por formarse en latitudes máis altas do habitual. Agora está a deixar chuvias abundantes en Galicia. Ao parecer, o seu vórtice está a mostrar, de novo, características subtropicais. Así o describe o investigador da Axencia Estatal de Meteoroloxía (AEMET) Juan Jesús González Alemán, quen asegura que, de momento, este cambio no seu comportamento só afecta a zonas marítimas e non ao posible impacto que poida ter sobre a península.
González Alemán non foi o único experto que puxo o foco de atención neste asunto. Dende Meteored, Juanjo Villena avisaba dunha “estrutura moi sospeitosa” no centro da borrasca ex Danielle e, entre interrogantes, preguntaba se non se estaría a tratar dun ciclón subtropical. A este respecto, o tamén investigador de Meteored Victor M. González, explicaba en Twitter que o “núcleo tormentoso persistente” que se aprecia no centro de ex Danielle demostra que volver ter algunhas características propias dos ciclóns subtropicais. Iso si, convivindo coa estrutura de “borrasca típica”. E engade: “Podería tratarse dun ciclón tropical en desenvolvemento”.
Con todo, de igual maneira que puntualizaba González Alemán, o investigador de Meteored insistía en que na península non ían cambiar moito o escenario, polo menos de momento. M. González insta a seguir atentos ao fenómeno para comprobar se a estrutura incipiente logra desenvolverse ou tan só queda como “unha anédota”. Polo de pronto, só se seguen prevendo chuvias, tormentas e rachas de vento, de igual maneira que xa se prognosticaran antes de que ex Danielle adquirira, de novo, características subtropicais.
Seguen as chuvias
Ata o momento, e tal como anunciaba hoxe a AEMET, ex Danielle deixou, sobre todo, chuvias no oeste da península e os refachos de vento tan só foron moi fortes en zonas altas e de costa. Á espera das posibles transformacións que aínda poida sufrir a borrasca, dado a incerteza do seu comportamento dende o primeiro momento da súa formación, Meteogalicia prognostica que a inestabilidade atmosférica continuará ao longo deste mércores. Porén, ao final da xornada prevese que a borrasca “se debilite rapidamente”. É dicir, haberá ceos anubrados, chuvascos puntualmente fortes e treboentos, sobre todo pola tarde. Porén, de noite remitirán en boa parte do territorio.
