A organización social é dos camiños para combater os efectos do cambio climático. Así o cre unha iniciativa pioneira en todo Estado que analizou once proxectos sociais centrados en atopar respostas para os desafíos que presenta o quecemento global.
Dous dos proxectos analizados polo proxecto CLIMACTIVA, no que participan investigadores da USC e membros da cooperativa galega Feitoría Verde, están en Galicia. Entre as once iniciativas seleccionadas están a Comunidade de Montes de Baroña e a de augas do Galiñeiro.
A primeira xurdiu na parroquia de Porto do Son coñecida polo seu castro a pé de mar. Está considerada unha das comunidades de montes máis activas de Galicia grazas á implicación dos veciños ca xestión de 875 hectáreas de montes. Alí desenvolven tarefas para aproveitar os montes co resinado das árbores, o emprego de gando ou a micoloxía.
Na serra do Galiñeiro, no concello pontevedrés de Gondomar, constituíuse hai anos un colectivo para facer fronte aos problemas na distribución e abastecemento das augas. Organizase como unha entidade sen ánimo de lucro cun sistema participativo para xestionar os recursos hídricos que chegan das traídas veciñais.
Para os investigadores do proxecto CLIMACTIVA, contar cunha base social organizada que sexa quen de achegar medidas preventivas é unha das claves para fortalecer a resiliencia e a capacidade de adaptación das persoas ante os impactos do cambio climático.
As administracións, ás veces, un atranco
O estudo pon de manifesto que boa parte das iniciativas que se enfrontan a desafíos climáticos xurdiron de entidades xa existentes encargadas de xestionar un recurso ou espazo, como é o caso do monte en Baroña e da auga no Galiñeiro.
Os investigadores alertan que, en moitas ocasións, as administracións póñense no camiño destas iniciativas e exercen como unha barreira para a construción destes espazos que promoven mecanismos de adaptación.
Outra das conclusións é que tamén neste tipo de proxectos existen prexuízos de xénero que penalizan ás mulleres, sobre todo, á hora de tomar decisións.
