Galicia obtivo este ano 114 praias con bandeiras azuis, seis menos ca o ano pasado. A comunidade concentra unha de cada cinco das que hai en toda España pero, así e todo, tamén unha de cada oito bandeiras negras do país. O informe, presentado por Ecoloxistas en Acción, menciona casos de praias mal xestionadas ou que son vítimas da contaminación química.
Un dos principais problemas que destacan desde a organización é a apropiación ou ocupación do espazo de Dominio Público Marítimo Terrestre (DPMT) no litoral español. É unha práctica habitual, segundo aseguran no informe, dos particulares adiñeirados e de sociedades mercantís. “A pesar da súa flagrante ilegalidade, moitas administracións non aplican a xa insuficiente Lei de Costas”, avisan desde Ecoloxistas en Acción.
É o caso, por exemplo, da bandeira negra situada na illa de Toralla, en Vigo, un espazo que é considerado privado. Desta forma, non se permite o paso aos veciños e os cidadáns da zona. Tamén menciona a concesión de espazos a empresas privadas, como no caso da Illa Pancha, en Ribadeo, que ademais pertence á Rede Natura 2000.
Ecoloxistas en Acción inclúe nas súas bandeiras negras a praia do Con, en Moaña. “A finca ocupada polo chalé de Núñez Feijóo e a súa parella incorre en terreos do DPMT”, aseguran dende a plataforma.
Contaminación química e Altri
En referencia á contaminación, a lista inclúe a praia de Area Grande, na provincia da Coruña. As continuas verteduras de augas fecais sobre a estrada CP-503 é, segundo a asociación, o motivo desta bandeira negra. Tamén pola contaminación está marcada a bolsa de lodos de San Ciprián, en Lugo, unha lagoa artificial de residuos tóxicos que produce emisións de fluoruro de alumino, con hidróxido de sodio na súa auga e no que hai risco de colapso do dique, practicamente desbordado. A rotura dunha balsa cuns residuos similares provocou unha catástrofe química en Hungría en 2010.
A sexta bandeira negra que sitúa Ecoloxistas en Acción é, de forma simbólica, na ría de Arousa, na Coruña. A causa desta última é, segundo a plataforma, a ameaza de Altri de destruír o ecosistema da zona. Destacan tamén as consecuencias do chamado proxecto Gama, que requirirá unha captación de 46 millóns de auga ao día.
O informe tamén destaca o que supón Ence para a ría de Pontevedra. “É un dos exemplos de ocupación e uso industrial indebido do DPMT”, aseguran, e recordan que é un dos puntos que máis recibiu bandeiras negras desde que se comezou a publicar anualmente este documento hai 20 anos.
