Galicia está a vivir un mes moi inestable, con temperaturas por debaixo das habituais para esta época do ano e con abundantes precipitacións en todo o territorio. Porén, na recta final de mes parece que o tempo vai adquirindo as características propias do verán. Un anticiclón volve exercer a súa influencia sobre Galicia e deixará ata mediados de semana temperaturas que acadarán os 30 graos, especialmente no sur da comunidade. Con todo, os termómetros baixarán considerablemente a partir do xoves, especialmente no norte, onde dificilmente se superarán os 20 graos de máxima. Malia os valores, baixos para finais de maio, o tempo será solleiro, polo menos, ata a entrada da próxima semana.
Os días de máis calor serán o martes e o mércores, dado que o luns os valores máximos roldarán os 20 graos agás en Ourense, que acadará os 26; e en Pontevedra, que se chegará aos 25. Este breve pero intenso episodio de altas temperaturas comezará o martes, cando se agardan néboas matinais no interior que se irán disipando conforme avance a xornada. Tamén é probable que se producen néboas durante a tarde no litoral norte. Isto, que contribúe a que as temperaturas non aumenten tanto como deberían, compleméntase nas Rías Baixas cun vento do noroeste. No que respecta aos termómetros, os valores máximos volverá a acadalos Ourense, con 30 graos. O resto de cidades galegas roldarán os 25 agás A Coruña e Ferrol, que non superarán os 22. O mércores, o escenario atmosférico será moi parecido ao do día anterior.
O patrón comezará a cambiar a partir do xoves. Aínda que Galicia continuará baixo a influencia das altas presións, o vento do nordés baixará considerablemente as temperaturas, especialmente no norte de Galicia. Así, A Coruña e Ferrol quedarán nos 18 graos de máxima, que tamén se rexistrarán en Santiago. As cidades do sur, como Pontevedra, Vigo e Ourense, roldarán os 27 graos. Malia a incerteza do prognóstico de cara á fin de semana, está previsto que ata o vindeiro luns continúe raiando o sol sobre Galicia e con moi baixas probabilidades de precipitación. Porén, o predominio dos ventos de compoñente norte baixará considerablemente as temperaturas que, segundo Meteogalicia, serán baixas para a época do ano. De feito, a previsión é que non superen os 20 graos de máxima de cara á fin de semana.
O meteorólogo Mario Picazo explica nun artigo publicado no portal eltiempo.es que esta baixada das temperaturas a partir da segunda metade da semana débese pola chegada de aire frío debido ao paso de sistemas frontais que, de momento, non afectarán Galicia. “Aínda que a semana arrinca con tempo bastante estable e boas horas de sol en moitas zonas, ao longo da semana veremos como dende o Atlántico vai chegando algún sistema frontal para aumentar a nubosidade e deixar precipitacións”, explica. Isto acontecerá a partir do xoves, onde é probable que se rexistren chuvias illadas na Mariña, pero sen a intensidade nin a continuidade das últimas semanas.
