A inestabilidade atmosférica chega para despedir un maio de tempo primaveral. Varias zonas da Península atópanse en risco por seca e non parecía factible hai unhas semanas que caera unha tromba de auga tan importante antes da chegada do verán. Esta falta de chuvias debíase a un gran anticiclón de bloqueo que desviaba todas as borrascas que se puidesen situar sobre o noso mapa. Agora, estas altas presións desprazáronse ata o norte de Europa: Gran Bretaña, Irlanda, Dinamarca, Noruega, Francia e Alemania. Este desvío provocou un corredor por onde se introducirán unha sucesión de borrascas ata, segundo apuntan algúns expertos, case xullo. Será unha borrasca fría a que marque o tempo os próximos días.
Este xiro drástico na situación atmosférica pode aliviar o abril máis seco dende que existen rexistros. O 29 de maio estiveron ata 14 comunidades por risco de chuvia e tormenta. Os litros por metro cadrado xa se superaron e a AEMET apunta que será unha constante durante as próximas semanas. En Galicia producíronse importantes inundacións na cidade de Ourense e a auga entrou en varios garaxes e establecementos. A acumulación de auga nas rúas impediu o tránsito dos peóns e especialmente na Ponte Romana, onde varias persoas intentaron cruzar coa auga polos xeonllos. Os transeúntes non dubidaron en tomar vídeos e compartilo nas redes sociais, así como das sarabias.
É na metade sur do país onde se concentran a maior parte das tormentas, especialmente en Ourense e sur de Lugo. No interior, a probabilidade de temporal é moi alta e vai baixando a medida que nos achegamos á costa. En Santiago de Compostela a tormenta provocou indicencias no tráfico e inundacións nalgunhas rúas, así como un accidente na AP-9. A AEMET mantén este martes o aviso amarelo. Segundo Meteogalicia, a vindeira semana haberá alta probabilidade de chuvias de tipo tormentoso, menos probables no litoral onde se poden concentrar brétemas. Esta situación atmosférica é propia para a época do ano na que nos atopamos, de feito, maio é o mes no que se rexistran máis raios. Foi o 26 de maio do 2017 o día récord de raios.
En canto as temperaturas, non sufrirán grandes cambios e manteranse nunha media de 25 graos de máxima e entre 14 e 12 de mínima. Segundo apunta a AEMET, esta anomalía en xuño pode provocar un descenso nas temperaturas con aire frío. Pola súa banda, eltiempo.es apunta a que a última hora do xoves a borrasca fría podería terse disipado na súa totalidade, mais permanecería o aire frío que o acompaña e entraría polo suroeste. Esta semana na que comeza xuño as precipitacións afectarán fundamentalmente ao interior noroeste e suroeste. En Galicia as predicións apuntan ata acumulacións entre 15 ou 20 mm nunha hora, así como posible sarabia no interior.
