Esta fin de semana será complicada para as persoas que padecen problemas de alerxia ao polen. Os sistemas de prognóstico avanzan un incremento dos niveis de pole de árbores a partir do venres. Todo nunha fin de semana solleiro e de temperaturas altas, polo que as choivas non axudarán a rebaixar a concentración no aire das partículas no aire de bidueiros, oliveiras ou carballos.
Os bidueiros atópanse nun estado de floración avanzada, polo que Galicia acadará valores altos nos próximos días en todo o territorio galego. De feito, o semáforo co que a Rede Galega de Aerobioloxía indica a concentración de pole no aire marca en vermello a práctica totalidade do territorio galego. No caso dos carballos, a peor situación dáse en Ourense e no sur de Lugo, namentres que nas estrugas prodúcese na costa da provincia da Coruña, tamén sinalada en cor vermella.
Será unha fin de semana na que a floración dos campos de oliveiras en territorios como Andalucía ou Estremadura combinada con ventos do sur traerá a Galicia a presenza de pole desta árbore ata acadar valores altos. Así o avanzan as predicións de Corpernicus, o programa europeo de observación terrestre, que apunta a que o pole das oliveiras virá acompañada do das herbáceas.
