A Asociación para a Defensa Ecolóxica de Galiza (Adega) organiza para esta fin de semana a sétima edición da limpeza simultánea de praias. Unha actividade aberta a centros de ensino e diversas entidades (en total participarán máis de 20), que ten por obxectivo, alén de recoller o lixo que se atope nas praias, facer unha chamada de atención sobre o problema crecente dos residuos mariños.
“A insostibilidade dos modelos de consumo e produción da nosa sociedade, as malas estratexias na xestión dos nosos residuos e a falta de sensibilización da poboación están detrás deste importante problema ambiental. Cada ano, 10 millóns de toneladas de lixo rematan nos océanos, lixo que provén da industria do mar (pesca, extraccións…), mais unha grande parte chega a través dos ríos, debido a unha mala xestión dos residuos en terra”, explican desde Adega.
Máis dun millón de aves e 100.000 mamíferos morren cada ano por mor dos residuos mariños
Así, os vertidos ao mar provocan serios danos nos ecosistemas mariños. Estímase que máis dun millón de aves e 100.000 mamíferos morren cada ano enredados nestes residuos ou por inxesa deles. Outro dos problemas asociados a estes residuos, é que provocan perdas económicas importantes, debido a que diminúen a pesca comercial e degradan lugares aptos para actividades recreativas e turísticas, ademais de supoñer un enorme gasto de limpezas de praias.
Con esta actuación, Adega busca concienciar a cidadanía da importancia dunha axeitada xestión dos residuos e do consumo. A sensibilización do voluntariado é chave para a realización destas xornadas podendo observar de primeira man a cantidade de lixo a agochan a nosas praias. Por tanto, fan un chamamento a todas as entidades, centros de ensino, concellos e persoas a título particular para que participen do obxectivo desta xornada e poder desfrutar de praias saudábeis.
Máis información:
– Contacto: 698139913 ou itziar@adega.gal.
– (PDF) Protocolo de limpeza de praias.
