Os restos do furacán Kirk chegarán a Galicia reconvertidos nunha potente borrasca. Aínda que inicialmente as axencias meteorolóxicas prognosticaron o seu paso pola comunidade a partir deste martes, segundo os datos actualizados por MeteoGalicia a súa entrada na Península Ibérica non será ata a madrugada do mércores. Agora, o servizo meteorolóxico galego eleva a alerta a un nivel vermello nas Rías Baixas polos fortes refachos de vento, que poderían acadar a forza 10 no mar aberto (entre os 130 e os 140 km/h). Segundo a escala de Beaufort que avalía a velocidade do vento e as súas consecuencias, nun escenario de forza 7, máis baixo, xa costa moverse contra a direción no vento.
As recomendacións ante un aviso deste tipo inclúen permanecer nos fogares e evitar calquera tipo de actividade no exterior e, no caso de ter que desprazarse, tomar os eixes principais de circulación. A borrasca impactará primeiro no norte da provincia coruñesa, moi preto da costa de Fisterra, activando a alerta laranxa en toda a comunidade galega. Agárdanse ventos furacanados na Mariña lucense e acumulacións de auga de 161 litros por metro cadrado en rexións do interior de Pontevedra.
A alerta vermella activarase dende as 06:00 horas da madrugada do mércores ata as 09:00 horas da mañá e virá acompañada doutra alerta laranxa con respecto á chuvia na mesma rexión. O resto da comunidade tamén permanece baixo alertas naranxas por vento e choiva. Precisamente nas horas desta madrugada chegará a borrasca a Galicia, e permanecerá no territorio como mínimo ata o xoves.
Malia que Kirk xa perdeu a categoría de furacán, quedan por diante máis de 48 horas nas que os territorios da Península e, especialmente Galicia, veranse expostos a condicións atmosféricas extremas, como ventos furacanados e tempestades.
