Galicia leva semanas encadeando unha borrasca tras outra. Ingrid e Joseph foron as últimas, que deixaron unha chuvia incesante que desembocou en centos de incidencias en toda a comunidade e ríos desbordados. O prognóstico do tempo non apunta á estabilidade, senón á chegada de novos sistemas frontais asociados a borrascas atlánticas que continuarán regando o país, polo menos, ata comezos de febreiro. Segundo a previsión de Meteogalicia, o xoves volverá activarse a alerta en toda Galicia por fortes refachos de vento e temporal marítimo.
Tal e como recolle o boletín de avisos emitido pola institución meteorolóxica, a alerta laranxa estará activada en todo o litoral galego ao longo do xoves por ondas que poden acadar os seis metros. Tamén estará activada a alerta amarela por vento de forza 7 no noroeste da Coruña, na Costa da Morte e na Mariña lucense. En terra tamén está activado o aviso amarelo por refachos que poden acadar os 80 km/h, sobre todo de madrugada e a primeira hora da tarde.
Unha fin de semana pasada por auga
Unha nova borrasca situada ao suroeste de Irlanda marcará o tempo de cara ao venres. As chuvias serán localmente treboentas e máis intensas na fachada atlántica. De feito, a situación no mar será “moi complicada”, tal e como definen dende Meteogalicia. Durante a primeira metade do sábado haberá unha tregua, mais cara ao final do día chegará unha nova fronte que deixará chuvias no litoral da provincia da Coruña que se irán desprazando conforme avance a tarde ao resto de Galicia.
A situación e medio prazo non mostra cambios significativos no patrón meteorolóxico. Febreiro comezará co predominio e a influencia das baixas presións sobre a península ibérica, cun corredor atlántico apuntando directamente a Galicia, polo que a probabilidade de precipitación ata o mércores 4 estímase nun 90%. As temperaturas tamén serán baixas para esta época do ano.
O incomPPetente de cRueda de Vil enviará o Es-alert esta ves?