Galicia quedou este luns nunha situación intermedia entre altas e baixas presións que fixo que o ceo estivera parcialmente nubrado con precipitacións intermitentes pola mañá que foron remitindo co avance do día. Porén, o temporal no litoral galego, nomeadamente na provincia da Coruña, deixou fortes ondadas que chegaron a mergullar case por completo a duna da praia de Riazor. Non era para menos. Contra a fin da fin de semana, os servizos meteorolóxicos da Xunta de Galicia elevaron a laranxa a alerta polos fortes ventos do litoral. A forza das ondas durante a pleamar fixo que a auga chegase a arrecunchar a duna conta o paseo marítimo da capital coruñesa. Malia os fortes ventos e as chuvias dispersas, dende o Concello da Coruña explicaron que non houbo ningún incidente de gravidade.
O causante destas inclemencias segue a ser o vento do sur que dende a mañá do luns até a noite tornou cada vez máis intenso e que trouxo unha das noites máis frías do que vai de outono. O luns sen dúbida foi singularmente ventoso, con chuvascos na metade oeste durante o día e con chuvias en toda Galicia na madrugada. No mar, non só en Riazor, as ondas de máis de 5 metros mantivéronse activas ata ás 12.00 horas. “O paso da fronte deixou durante a madrugada rexistros de vento e chuvia destacados como vemos nos mapas. Hoxe martes continuaremos con circulación do suroeste con chuvascos intermitentes, máis frecuentes durante a mañá na metade sur. O vento irá amainando na segunda metade da xornada”, argumentan dende MeteoGalicia.