O servizo de meteoroloxía de Portugal chamouna en Efraín e, dende a mañá deste luns, os efectos desta borrasca procedente do Atlántico estánse a facer notar con forza en todo o país. A Axencia Estatal de Meteoroloxía puxo en alerta a un total de 33 provincias en todo o Estado pola chegada de fenómenos significativos. Durante toda a xornada e máis este martes haberá presencia de choivas persistentes e localmente fortes no cuadrante suroeste de Galicia. Tamén refachos de vento moi fortes na costa oeste da Coruña pola mañá e temperaturas máximas en ascenso notable en Lugo.
Segundo a predición da Aemet, a borrasca Efraín ségue a achegarse á Península Ibérica e por iso continuarán as precipitacións en todo o país. Mais, polo de agora, a afección ao territorio está a ser indirecta, transportando humidade e favorecendo que as frontes que atravesan a xeografía galega deixen choivas abundantes. Desde a súa posición, a borrasca Efraín impulsa unha corrente de aire moi cargada de humidade desde practicamente o Caribe até a Península Ibérica, o que se denomina como río atmosférico, segundo explica a Aemet.
A predición é de ceos cubertos. Tamén choivas e chuvascos xeneralizados con tormentas ocasionais, que serán persistentes na metade occidental onde poden ser localmente fortes, sendo máis intensas no cuadrante suroeste. Dende a Aemet tamén apuntan a probables brumas e bancos de néboa en zonas elevadas de Ourense, temperaturas en ascenso, localmente notable o das máximas en Lugo e vento do sur e sueste que será frouxo no interior ao principio e que aumentará a oeste e suroeste con intervalos fortes no litoral e refachos moi fortes na costa oeste da Coruña pola mañá.
Ventos de ata 120 km/h
O temporal tamén está a deixar fortes ventos na Comunidade con refachos de máis de 120 km/h en lugares como Castro Vicaludo, no municipio pontevedrés de Oia (127,5 km/h) ou na Gándara, no concello coruñés de Vimianzo (125 km/h). No mar a situación tamén se complicou e a naviera Mar de Ons comunicou que suspende o transporte entre Cangas e Vigo até novo aviso debido ás malas condicións meteorolóxicas.
Voos desviados no sur de Galicia
Dous voos con destino ao aeroporto de Peinador de Vigo foron desviados durante o comezo desta semana debido ás inclemencias meteoroóxicas que vive a cidade. Segundo confirman fontes de Aeroportos Españois e Navegación Aérea (Aena), un avión procedente de Madrid foi desviado a Santiago de Compostela debido ao vento rexistrado no aeródromo vigués. Por iso, os seus pasaxeiros foron desprazados por estrada para finalizar o traxecto a Vigo. Ademais, outro voo que partiu de Barcelona na mañá deste luns foi desviado a Madrid, ao non poder aterrar en Vigo tamén polo vento.
