A doutora de Ciencias Matemáticas e decana da Facultade de Matemáticas na Universidade de Santiago de Compostela, María Elena Vázquez Cendón, recibirá o premio María Josefa Wonenburguer deste 2022.
A decisión foi comunicada pola Xunta no último pleno da Unidade Muller e Ciencia, onde tiveron en conta a carreira de investigación e divulgación da matemática.
O galardón, outorgado anualmente desde o ano 2007, foi creado polo Goberno autonómico para distinguir ás mulleres galegas con traxectorias nos ámbitos científicos e tecnolóxicos, “dando valor á súa carreira e converténdoas en referentes para as próximas xeracións”.
Nome dunha pioneira galega da ciencia
Así mesmo, conta co compromiso do Goberno galego desde a Consellería de Promoción de Emprego e Igualdade e leva o nome dunha das pioneiras galegas na área científica.
Nesta liña, desde a Xunta encomiaron a carreira de Vázquez Cendón, polas súas contribucións no estudo das leis de balance hiperbólicas e o seu compromiso coa divulgación, coa súa presenza á fronte do Proxecto de Estímulo do Talento Matemático (Estalmat-Galicia) desde 2021.
A galardoada recibirá o premio nun evento, o vindeiro día 20 en Santiago de Compostela, e contará coa presenza de membros do Goberno galego e do ámbito universitario e científico e da sociedade.
O premio María Wonenburger, que recoñece as traxectorias de excelencia de científicas galegas, recaeu en anteriores edicións en Inmaculada Paz Andrade, Teresa Miras Portugal, Marisol Soengas, Carmen Navarro e Ofelia Rey, Tarsy Carballas, María José Alonso, Carmen García Mateo, Isabel Aguirre de Úrcola, Peregrina Quintela, Begoña Vila Costa, Alicia Estévez, Mabel Loza, Amparo Alonso e María Victoria Lareu Huidobro.
