Luns 4 Marzo 2024

X = Gciencia

A protagonista das matemáticas en moitos problemas comezamos chamándoa X. Sendo a incógnita, coñecemos que ten que verificar, como se relaciona con outros datos ou parámetros do modelo e, o obxectivo do problema, é achar ou aproximar a nosa protagonista. Fai dez anos as persoas que soñaron Gciencia sabían o problema que estaban a formular e hoxe, parabenizamos a valía de Gciencia.

Despexar a incógnita é asociala aos valores que representa: á X do seu aniversario e á visibilidade que lle deu ás achegas e ás persoas da ciencia. En suma, a identidade consciente do título quere salientar que X é igual a dez anos de comunicación da Ciencia en Galego.

Publicidade

Este soño fíxose realidade ao coidar con detalle e rigor, desde fíos precisos que relataron a viaxe épica de Domingo Fontán, ata achegas recentes, premios e entrevistas a moitas persoas que partillamos coñecementos, emocións, vocacións e o talento das persoas refuxiadas. Procurar na súa web á USC, ao Consello da Cultura Galega, á Real Academia Galega de Ciencias, nomes de colegas e o meu propio, lévame a mergullarme nos artigos, nos retratos de colegas e mozos e mozas de Estalmat-Galicia… e como corolario activa a morriña do vivido e aprendido e sobre todo a gratitude por estes X anos.

Achar Gciencia cada día é poder ver de preto estrelas, co telescopio do xornalimo da divulgación

A igualdade que está no título tamén salienta a equidade que buscamos na ciencia, comezando pola semente de vocacións, para que con maior información a mocidade decida con maior liberdade. E sempre, polo 11F, o día da nena e a muller na ciencia, Gciencia puxo o foco e a letra, propiciando encontros. Gardo unha fonda pegada do Teatro de Pontevedra deste ano, agradecendo ao Concello tamén o fondo compromiso co acto, pola contorna propiciada e o valioso fluxo de preguntas xerado polo alumnado de ensino medio que tan activamente participou. Considero que, ademais de partillar espellos científicos, ao empregar o galego e minorar distancias seleccionando a mellor das frecuencias, a nosa lingua, as persoas que dan vida a Gciencia xeran xornalistas de todas as idades que proxectan a curiosidade con intelixentes preguntas como as súas.

A existencia de Gciencia tamén creou a conCiencia, a todos os niveis, da importancia de profesionalizar a comunicación científica e asemade reforzou o compromiso que algunhas persoas activamos fai tempo, non só de facer ciencia, senón tamén de partillala sumando a divulgación ás nosas encomendas. A sociedade que nos financia debe coñecer que facemos, como reverte na contorna e cales son os tempos precisos para que agrome a ciencia sementada.

Grazas a todas as persoas que fai X anos soñaron este valioso proxecto, achar Gciencia cada día é poder ver de preto estrelas, co telescopio do xornalimo da divulgación, que levan emitindo luz desde hai moitos anos. Grazas Gciencia por ser unha estrela máis no firmamento científico en galego!

Elena Vázquez Cendón
Elena Vázquez Cendón
Decana da facultade de Matemáticas da Universidade de Santiago de Compostela.

DEIXAR UNHA RESPOSTA

Please enter your comment!
Please enter your name here

Este sitio emprega Akismet para reducir o spam. Aprende como se procesan os datos dos teus comentarios.

Relacionadas

Un proxecto galego impulsa a sustentabilidade do sistema alimentario a través da IA

O proxecto no que participan USC e UVigo acometerá a crise do sector co apoio do Programa Marco ‘Horizonte Europa’

As mulleres protagonizaron anuncios de banca antes de poder abrir libretas de aforro por si soas

Un estudo da USC analiza os roles femininos nas ilustracións e fotografías utilizadas na publicidade bancaria entre 1949 e 1970 en España

Gciencia celebra o Día da Lingua Materna cun relatorio sobre a divulgación en galego

A xornalista Laura Filloy abordou a importancia de trasladar o coñecemento científico á sociedade nun acto celebrado no Campus de Lugo da USC
00:05:02

Poñer a roupa ao clareo do Sol, funciona?

É unha técnica tradicional para branquear a roupa que seguimos empregando hoxe. A ciencia confirma a eficacia dos raios solares como o mellor desinfectante natural