O Aquarium Finisterrae acollerá este sábado 26 de novembro, en horario de 10:00 a 14:00 horas e de 16:00 a 19:00 horas as actividades organizadas pola Universidade da Coruña e os Museos Científicos Coruñeses para celebrar o aniversario da saída da Real Expedición Filantrópica da Vacina da varíola do porto coruñés.
A V Feira científica Isabel Zendal constará de obradoiros preparados polo grupo de innovación docente e divulgación científica UDCiencia, en colaboración con outras entidades, entre elas a Facultade de Enfermaría e Podoloxía da UDC.
A actividade conmemora o aniversario da saída da Real Expedición Filantrópica da Vacina do porto da Coruña, o 30 de novembro de 1803, hai 219 anos. Nesta travesía marítima tivo un papel destacado a coruñesa Isabel Zendal, como responsable dos nenos que portarían a vacina das vexigas. Será unha oportunidade para descubrir e aprender ciencia participando en diversos experimentos, xogos e actividades.
Os obradoiros serán os seguintes:
- O descubrimento da vacina contra as vexigas
- Isabel Zendal e os nenos da vacina
- As vacinas e a vacinación
- Eureka, flotan!
- Coidando en alta mar
- Moby Dick e os nenos vacuníferos
- As aves que acompañaron á REFV
- Cal e o camiño? As matemáticas teñen a resposta
- Os cheiros da corveta
- RCP e o uso do desfibrilador: técnicas sinxelas que salvan vidas
- Os medicamentos da expedición: tesouros do bosque