Desde este mércores 21 e ata o vindeiro 19 de decembro, a Domus dos Museos Científicos Coruñeses acollerá o Mes Escéptico, un ciclo de conferencias organizadas xunto ao Círculo Escéptico, nas que se pon o punto crítico sobre diferentes temas abordados desde a perspectiva científica. A actividade está homologada con oito horas de formación de profesorado. Todas as charlas do ciclo serán de acceso libre e gratuíto.
A primeira das sesións, que leva o título De la papilla a los macarrones, todo son marrones, será o mércores 21 de novembro, ás 19.30 horas. Nela falará Gemma del Caño, farmacéutica especialista en Industria e I+D e experta en industria alimentaria. Del Caño abordará que hai de certo e de falso sobre as ideas dunha boa alimentación infantil, moitas veces influído pola información que vén da industria alimentaria.
Programa (todas son ás 19.30 horas)
– 28 de novembro: Muchas luces y algunas sombras de la tecnología y la accesibilidad, por Fátima García Doval, mestra, licenciada en filosofía e ciencias da educación e doutora en didáctica e innovación.
– 12 de decembro: Caramelos de Alto Riesgo. #StopPseudoterapias”, por Elena Campos Sánchez, Doutora en Biociencias Moleculares (especialidade Biomedicina). Presidenta da Asociación para Proteger al Enfermo de Terapias Pseudocientíficas (Apetp).
– 19 de decembro: Adicción a internet: enganchados a un diagnóstico, por Eparquio Delgado, Psicólogo Xeral Sanitario.
Para obter a certificación de profesorado será necesario asistir a todas as sesións. Aos efectos de homologación de formación do profesorado é necesario facer a inscrición nesta ligazón.
