Únete á nosa canle de Whatsapp
A Orquestra Sinfónica de Galicia (OSG) dedica un concerto, o próximo día 17 de novembro, ao 30 aniversario da creación da Asociación de Amigos da Casa das Ciencias (AACC), un acto ao que se poderá asistir con invitación. Como acto previo ao concerto, a entidade presidida por Julio Casal González tamén organiza dúas conferencias que versarán sobre a relación entre música e ciencia para celebrar as súas tres décadas de historia. A asociación, que naceu “co obxectivo de apoiar as actividades desenvolvidas polo primeiro dos museos científicos da cidade, a Casa das Ciencias” tamén colabora cos outros tres centros deste tipo que hai na urbe: a Domus, o Aquarium Finisterrae e o Muncyt.
A pesar de que a data exacta de creación da entidade foi o 13 de xullo, o programa do aniversario coincide coa celebración en torno á Semana da Ciencia, do 11 ao 19 de novembro. Con motivo deste evento haberá varias actividades que conmemoren os achados e investigacións científicas, neste contexto, a Domus acolle a conferencia da poeta, música e astrónoma afeccionada Estíbaliz Espinosa baixo o título Onda Nós (música e astronomía na Coruña polímata)’. E a charla da man da pianista e divulgadora Almudena M. Castro, que versará sobre A beleza dos pequenos números no Palacio da Ópera. Ambas as conferencias teñen entrada libre ata completar aforo.
