Un camiñante que paseaba o pasado 7 de marzo pola praia de Islantilla, en Huelva, atopouse cunha criatura mariña descoñecida a primeira vista, debido á súa peculiar morfoloxía e ao seu estado de descomposición. Remitiu fotografías á Casa de la Ciencia de Sevilla, adscrita ao CSIC, mais os investigadores da institución tampouco souberon aclarar de que especie se trataba, segundo contou o Diario de Sevilla.
A criatura, de grandes dimensións, era un vertebrado, con cola e con cartílagos no que semellaba ser a cabeza. E o misterio xerou unha grande expectación nas redes da Casa de la Ciencia e na mesma praia, onde acudiron moitos curiosos antes de que o animal fora retirado por unha grúa. E algúns usuarios tamén achegaron ideas sobre a posible especie: falouse de diversos tipos de tiburón ou ben algún tipo de peixe da familia Regalecidae, á que pertence o peixe coñecido como rei dos arenques ou peixe remo (Regalecus glesne), que pode acadar máis de 10 metros.
Non en tanto, o misterio persiste, e revelarase en breve en Vigo. Ata o Instituto de Investigacións Mariñas (IIM-CSIC) xa viaxaron varias mostras de ADN que recolleron os investigadores do Instituto de Ciencias Mariñas (ICMAN-CSIC) Laura Prieto, Antonio Moreno, Alberto Arias e David Roque, e o propio director Julián Blasco, que estiveron presentes en Islantilla.
Ya hemos realizado la recogida de muestras de ADN del cadáver de animal encontrado en la playa de Islantilla. Ha sido posible gracias a nuestros investigadores del @ICMAN_CSIC y la colaboración de la Mancomunidad de @islantilla Estas muestras viajan ahora a Galicia @IIM_CSIC pic.twitter.com/LE4seh4WSS
— Casa Ciencia Sevilla (@CasaCiencia_Sev) 14 de marzo de 2019
Coincido con Lyly, incluso diría: Gciencia é estupenda, non a estraguemos con títulos enganosos!
Un saúdo!
Ola! O título da noticia é confuso, semella que o Instituto vigués xa descifrou a especie da que se trataba, non que estea en proceso. Estaría ben corrixilo, grazas. Estupenda páxina!