O Centro Oceanográfico de Vigo, pertencente á rede do Instituto Español de Oceanografía (IEO), suma un novo proxecto de investigación sobre unha das súas destacadas liñas de traballo: a análise do impacto dos microplásticos no medio mariño nun contexto de cambio global. Grazas a unha axuda Marie Sklodowska-Curie, o investigador Juan Ignacio Bertucci levará a cabo o proxecto App Marie dentro do grupo que coordina Juan Bellas.
Desde que a ONU proclamase o período 2021-2030 como a Década das Ciencias Oceánicas para o Desenvolvemento Sostible, a protección dos ecosistemas mariños é un dos retos marcados pola Unión Europea para o cal outorga as Accións Marie Sklodowska-Curie.
Grazas a esta competitiva e prestixiosa axuda, Bertucci desenvolverá o seu traballo no equipo liderado por Juan Bellas, profesor de investigación do IEO. Con este proxecto estudarán os efectos conxuntos dos microplásticos, os contaminantes químicos e os principais factores de cambio global que afectan aos nosos océanos, como o incremento da súa temperatura e a acidificación oceánica.
Científicos del #IEO estudiarán los efectos conjuntos de los microplásticos, los contaminantes y el cambio global en los ecosistemas
Gracias a una ayuda Marie Sklodowska-Curie concedida a nuestro compañero Juan Ignacio Bertucci de @IEOVigo
➡️ https://t.co/BjDKXx0BPN pic.twitter.com/CJcrBlnzKO
— Instituto Español de Oceanografía (@IEOoceanografia) July 7, 2021
Para iso empregará embrións de ourizo de mar como organismo modelo. O proxecto combinará a realización de bioensaios con técnicas moleculares e bioquímicas que permitirán avaliar o impacto dos mencionados factores a diferentes niveis de organización biolóxica.
Este proxecto xorde da necesidade de avances científicos que permitan orientar a recuperación dos ecosistemas mariños despois de constatar os danos causados polas actividades humanas. algunhas empresas internacionais con gran experiencia nos campos de enerxía e petroquímica (Shell) e plásticos (AIMPLAS) colaborarán no proxecto.
Os resultados científicos, protocolos e/ou aplicacións que xurdan do proxecto App Marie utilizaranse para crear un marco de investigación de interese para que investigadores, empresas e autoridades con competencia en xestión ambiental, analicen e compartan os seus propios datos, facilitando en última instancia a toma de decisións para a protección dos ecosistemas mariños.
