A importancia dos hábitats formados por grandes algas estruturais adoita subestimarse; porén, ofrecen refuxio, alimento e estrutura a unha gran diversidade de especies. Ademais, protexen a costa, capturan carbono, osixenan a auga e reforzan a resiliencia dos ecosistemas mariños. E agora podes ver dende a túa casa en que partes da costa hai maior concentración dunhas ou outras especies.
A plataforma Observadores do Mar lanza un mapa interactivo que reúne múltiples proxectos de observación de diferentes especies nun espazo único aberto á participación cidadá. Esta iniciativa está coordinada por diversos centros de investigación mariña do Consello Superior de Investigacións Científicas (CSIC), entre eles o Instituto de Ciencias do Mar (ICM) e o Instituto Español de Oceanografía (IEO), e é supervisada por persoal científico.
Os lugares con maiores observacións
O mapa recolle un total de 18 proxectos que os usuarios poden consultar. En total, o espazo interactivo permite a observación das seguintes liñas, tanto en relación con especies concretas como actividades condicionantes da saúde do ecosistema: Atención Corais!, Peixes Exóticos, Alerta Medusas, Crustáceos Decápodos, Peixes Mediterráneos, Aves Mariñas, Algas Invasoras, Pradeiras Mariñas, Familia Signátidos, Proxecto Nacras, Desertos Submariños, Microplastic Watchers, Basura Mariña, Peixes e Quentamento, Quenllas e Raias, Pesca Fantasma, Tartarugas Mariñas e Bosques Mariños.
As contribucións están abertas a calquera punto xeográfico, pero as características do proxecto fan que teña especial seguimento nas zonas terrestres e acuáticas do Mediterráneo e do noroeste peninsular, onde o mapa rexistra máis de 20.000 observacións de múltiples e diversas especies.
En Galicia, a familia dos signátidos (Syngnathidae) é a máis rexistrada, con máis de 400 imaxes recollidas nas costas da comunidade. Os membros desta familia, máis coñecidos como cabaliños de mar, teñen un forte arraigo polo seu entorno e posúen unha mobilidade moi limitada. A sección de Microplastic Watchers tamén conta con amplas contribucións por parte dos usuarios.
Como usar o mapa?
“Bosques Mariños” está activo no portal web de Observadores do Mar, onde se poden consultar os protocolos e empezar a colaborar. Hai unha serie de recomendacións que cómpre ter presentes para tomar parte nesta iniciativa: as fotografías deben ir acompañadas sempre da data e a localización e haberá que rexistrar a súa presenza e características, do mesmo xeito que tomar datos básicos da contorna.
Efecto da acidificación sobre as comunidades de macroalgas para o proxecto MITnPOINT. Panarea, Illas Eólias. Imaxe: Jordi Boada. 
Equipo de mergullamento antes dunha inmersión na Illa de Sálvora, Pontevedra. Imaxe: Ana Aja 
Bosque de “E. crinita” en Cala Estreta, Palamós. Imaxe: Clàudia Auladell Mostreo no hábitat de “Laminaria ochroleuca” en Santa Mariña, A Coruña. Imaxe: Jose Antonio Caballero Bosque de “Ericaria mediterranea”, na Cala Estreta, Palamós. Imaxe: Clàudia Auladell Quintana. Transecto de bosques mariños facendo snorkel. Cala Estreta, Palamós. Imaxe: Clàudia Auladell Quintana 
Mostreo no hábitat de “Saccorhiza polyschides”, na Illa de Ons, Pontevedra. Imaxe: Ana Aja
Tamén poderán realizaranse seguimentos mediante censos e transectos, anotando de forma sistemática a cobertura e o estado das algas en cada tramo (por exemplo, cada 25 centímetros), indicando se hai bosque ben desenvolvido, algas de menor tamaño ou roca espida, así como a presenza de herbívoros. Todas estas observacións subiranse á plataforma Observadores do Mar para permitir o acceso a outros usuarios.
A necesidade cidadá
Ante un escenario cada vez máis preocupante no relativo á conservación dos bosques mariños, Observadores do Mar fai un chamamento á cidadanía: pide información que complemente á obtida polos equipos científicos e contribúa á conservación e recuperación destes ecosistemas. A través da plataforma, calquera persoa pode informar sobre a súa presenza, realizar observacións puntuais ou facer seguimento dun mesmo “bosque”.
Podes consultar o mapa interactivo de Observadores do Mar na seguinte ligazón.
