Beatriz Reguera, profesora de investigación do grupo de Microalgas Nocivas no Centro Oceanográfico de Vigo, recibiu a finais de outubro o prestixioso premio Yasumoto (Yasumoto Lifetime Achievement Award), que entrega a Sociedade Internacional para o Estudo das Algas Nocivas (ISSHA). O galardón foille entregado a Beatriz Reguera no marco da 18ª Conferencia Internacional de Algas Nocivas celebrada en Nantes entre o 21 e o 26 de outubro.
O premio Yasumoto recoñece a traxectoria profesional da investigación no eido das algas nocivas
O premio concédese bianualmente desde o ano 2000, e recoñece as achegas relevantes dun investigador ou investigadora durante a súa carreira profesional, sobre todo no marco do estudo das algas nocivas e as ficotoxinas, así como a colaboración e os servizos prestados á ISSHA, segundo informa o Oceanográfico de Vigo.
No caso de Beatriz Reguera, a súa nominación foi presentada ao Consello da ISSHA en recoñecemento ás súas achegas ao coñecemento da bioloxía, dinámica de poboacións e estratexias de mostraxe das poboacións de dinoflaxelados do xénero Dinophysis, produtores de toxinas diarreoxénicas e uns dos causantes das habituais mareas vermellas.
Beatriz Reguera ten tamén ocupado cargos de responsabilidade internacional na súa carreira, como a presidencia do grupo de traballo do ICES-IOC sobre dinámica de poboacións de algas nocivas (1992-1996), e a presidencia da propia ISSHA (2008-2014). Entre outros galardóns, a investigadora do Oceanográfico foi tamén premiada en 2011 pola Comisión Oceanográfica Intergobernamental da Unesco.
