Sobre as 9.30 da mañá, Salvamento Marítimo recibía o aviso da aparición dun gran exemplar de balea común (Balaenoptera physalus) en augas próximas a Beluso, no concello de Bueu, na ría de Pontevedra. O seu volume, con 20 metros de lonxitude e máis de 30 toneladas de peso, obrigou a tomar precaucións na zona, onde hai un importante tráfico marítimo e varios polígonos de bateas, para evitar percances.
Segundo informou Alfredo López, da Coordinadora para o Estudo dos Mamíferos Mariños (CEMMA), o animal estaba xa en avanzado estado de descomposición, e estímase que levaba morto entre 5 e 7 días. Porén, segundo López, chama a atención que “a columna vertebral estaba totalmente fracturada“, o que é un indicio de que puido ser atropelada en alta mar por un barco de grandes dimensións e morrer debido aos golpes. Mais alén da fractura non había sinais que confirmasen esta posibilidade.
Retirada de cetáceo en estado de descomposición de 20 metros peligroso para la navegación cerca de Bueu. El buque María Pita con su auxiliar lo hizo firme y lo trasladó hasta Marín, donde la Autoridad Portuaria se hizo cargo. pic.twitter.com/8SDz294fiD
— SALVAMENTO MARÍTIMO (@salvamentogob) 20 de diciembre de 2018
O animal, despois de ser remolcado polo María Pita, foi retirado do mar por unha grúa e varios camións sacárona do peirao de Marín. Como é habitual nestes casos, estaba escoltada por un gran número de aves, sobre todo gaivotas, intentando sacar tallada de toneladas de alimento á súa disposición.
Segundo indicou Alfredo López, trátase dun dos exemplares máis grandes que apareceron mortos en Galicia nos últimos anos. Vai ser incinerada.
