Xa sabiamos da presenza de xeo en Marte, pero a imaxe que fixo pública esta semana a Axencia Espacial Europea non deixa de abraiar. A sonda Mars Express conseguiu tomar unha imaxe do cráter Korolev, un enorme furado de 82 quilómetros de diámetro situado no polo Norte do planeta, un pouco ao sur das dunas de Olympia Undae.
O volume de auga conxelada que acumula o cráter é colosal. Crese que Korolev ten máis de 2.000 metros de profundidade, e deles, 1.800 están cubertos polo xeo. A masa abrangue máis de 60 dos 82 quilómetros do seu diámetro. Por tanto, o volume estimado é de 2.200 quilómetros cúbicos de xeo.
A trampa fría do cráter de xeo
As dimensións do cráter Korolev (chamado así na honra do pai da enxeñaría aeroespacial soviética) provocan un curioso efecto. Aínda que en Marte existen variacións estacionais, o aire que se sitúa sobre o cráter vese afectado pola gran masa xeada, arrefriándose durante todo o ano. Por tanto, o frío arredor de Korolev fica estable. É o que se coñece en astronomía como trampa fría.
Máis información sobre o cráter de xeo Korolev, na web da Axencia Espacial Europea (ligazón, en inglés).
