Así son as mandíbulas e os dentes desta coñecida criatura mariña

Cando un pensa nunha criatura mariña con dentes afiados, a resposta máis obvia sería a quenlla. As mandíbulas do tiburón teñen sona, tamén no cinema, pero hai outros bechos que non quedan atrás. Tal é o caso do humilde ourizo de mar. Porque estes espiñentos seres que habitan no fondo mariño nin sequera parecen ter boca, e moito menos dentes. Agás que os mires de preto.

Aos ourizos de mar gústalles manter os seus cabeiros afiados. Pero non representan un perigo para o ser humano, agás polas súas espiñas.

Publicidade

As bocas de ourizo de mar atópanse na parte inferior do seu corpo. E un novo estudo descubriu como manteñen unha saúde dental axeitada. O traballo foi realizado por un equipo dirixido polo enxeñeiro mecánico e estrutural Horacio Espinosa da Universidade Northwestern, quen utilizou técnicas de microscopía electrónica para investigar como se desgastan os dentes de ourizo de mar durante os procesos de abrasión.

Os resultados confirman unha hipótese anterior a nivel microscópico: estes dentes afíanse a través da abrasión, do mesmo xeito que fai un afiador de coitelos. E o proceso é bastante diferente ao que sucede cos dentes humanos. A capa externa dos nosos dentes chámase esmalte , e cando desaparece, desaparece para sempre. Pola contra, os cinco dentes dun ourizo de mar están configurados en cinco mandíbulas e son diferentes. Cando se deteriora a capa fibrosa externa dos dentes, chamada “pedra“, é substituída por novos materiais que medran continuamente debaixo.

Publicidade

Co tempo, esa nova capa vai estragarse, co que volve repetirse o ciclo. “O desgaste afía o dente”, explica un dos membros do equipo, Hoang Nguyen: “A adición de novos materiais, a través do crecemento continuo dos dentes, compensa a perda durante a vida útil do animal”.

Así que o humilde ourizo de mar ten bos dentes durante toda a súa vida, pois medran sen descanso cando se deterioran.