Este é o segundo episodio do pódcast Todas as correntes levan ao CIM, un pódcast de GCiencia en colaboración co Centro de Investigación Mariña (CIM) da Universidade de Vigo para afondar coa sociedade no coñecemento do mar. Na ‘Corrente II’ falamos de sistemas de alerta temperá e os factores que poñen en perigo a habitabilidade dos ecosistemas mariños galegos co investigador José González Cao, quen desenvolve estes sistemas xunto co seu equipo.
O cambio climático provoca mudanzas na temperatura, salinidade e calidade da auga, sendo estes factores que afectan en gran medida aos recursos naturais presentes nas costas. Ademais da necesaria protección de animais, plantas e ecosistemas en xeral, o dano nestas augas provoca tamén un dano nas actividades humanas como a pesca, o marisqueo, a acuicultura ou o turismo. O desenvolvemento sostible das rexións costeiras require de manter o equilibrio entre os intereses da sociedade e os límites necesarios para a protección e respecto aos ecosistemas naturais e aos seres que viven neles.
As intensas chuvias que comezaron este outubro, por exemplo, tiveron como consecuencia unha diminución na salinidade da auga das rías galegas. Isto provocou, entre outras cousas, a mortalidade do 60% do marisco da ría de Muros e Noia ou o peche da temporada nas rías de Vigo e Pontevedra co obxectivo de salvar a campaña de Nadal.
Episodio realizado por Laura Veiga
Edición: Carlos Tresandí
Escóitao nas plataformas de pódcast: Spreaker, Spotify, Ivoox, iHeart, Deezer, Podcast Addict, JioSaavn e Podchaser.
