Únete á nosa canle de Whatsapp
Con tan só 10 minutos de contacto son capaces de reducir a infectividade dos virus en máis do 99%. Segundo unha investigación dun equipo de científicos españois, un tipo de vidro e unha arxila teñen unha “potente actividade viricida”. Son dous materiais inorgánicos de baixo custo que poderían empregarse para descontaminar superficies, líquidos e aires con partículas virais. Tanto o vidro como a arxila foron probados en diferentes tipos de virus, tanto no SARS-CoV-2, como na gripe, o herpes simple e os adenovirus. Tamén son eficaces contra bacterias e fungos e poderían empregarse como desinfectantes e, incluso, poderían servir para desenvolver medicamentos antivirais con baixa ou nula toxicidade.
Máis polo miúdo, os investigadores describiron a actividade antiviral dun vidro sodocálcico dunha arxila denominada caolín. Esta última contén nanopartículas de prata e de óxido de cobre que desactivan a infectividade do virus. Cando entran en contacto con el, os materiais provocan unha reacción físico-química que inhibe o crecemento destes patóxenos. Este mecanismo de actuación está directamente vinculado coas propiedades do material, que induce a agregación do virus no caso do vidro ou a absorción no caso dos materiais baseados en caolín, así como dos inóns liberados ao medio.
“Os materiais provocan unha reacción físico-química que inhibe o crecemento destes patóxenos”
Os achados deste estudo xurdiron a raíz da colaboración de varios equipos de investigadores do Centro de Investigación en Nanomateriais e Nanotecnoloxía (CINN, CSIC-Universidad de Oviedo-Principado de Asturias) e da Universidad Ceu San Pablo, así como do CISA-CSIC, da Universidad de Navarra e da Universidad Complutense de Madrid. Os resultados acaban de ser publicados na revista Materials Today Bio.
As vantaxes
“Estes materiais son capaces de inhibir significativamente o crecemento microbiolóxico, tanto de orixe bacteriana, como fúnxica ou vírica, e son perfectamente compatibles cos seres vivos e o medioambiente”, segundo explica a investigadora do CINN Belén Cabal. “Posúen outras importantes vantaxes, como son a súa alta estabilidade e baixo custo, o que os converte en materiais excepcionalmente apropiados para a prevención e o control de enfermidades, tanto de orixe bacteriana como vírica”, engade Cabal.
“A potente actividade viricida probouse en virus con características fisicoquímicas moi distintas, como o virus estomatítico vesicular, da mesma familia que o virus da rabia, o virus do herpes simple (HSV-1), os adenovirus, o virus da gripe ou o SARS-CoV-2, causante da actual pandemia”, indica o investigador da Universidade CEU San Pablo Estanislao Nistal Villán.
Referencia: Broad virus inactivation using inorganic micro/nano-particulate materials. (Publicado en Materials Today Bio)
