Un ensaio clínico en fase 1 probou vacinas personalizadas de ARNm contra o tipo de cancro de páncreas máis frecuente e que, ademais, ten mal prognóstico. O tratamento, que se prepara segundo as características do tumor de cada paciente, administrouse a 16 persoas xunto con cirurxía, quimioterapia e outro tipo de inmunoterapia. A metade delas mostrou unha resposta inmunitaria á vacina, o que se asociou cun mellor prognóstico. Os resultados publicáronse esta semana na revista Nature.
“O estudo está moi ben deseñado e a súa calidade científica é indubidable”, valora o xefe de Servizo do Hospital Clínic, Manel Juan. “Demostra algo que xa foi suxerido moitas veces antes (con datos menos sólidos), como é que a vacinación personalizada con ARNm de antíxenos tumorais é eficaz en inducir unha resposta e que pode, como mínimo, incrementar os períodos de supervivencia“, continúa explicando o científico en declaracións recollidas polo Science Media Centre España (SMC). Segundo di o investigador, o traballo confirma que os efectos adversos do tratamento son “claramente moi reducidos” contra un dos cancros con maior mortalidade.
Mostra reducida
Por outra banda, Juan recoñece que o estudo tamén ten as súas limitacións. A que el considera “máis importante” está relacionada co tamaño da mostra, é dicir, co número de pacientes tratados. “É claramente moi reducido”, expón. O investigador do Clínic continúa analizando o caso: “Unha vez confirmada a seguridade da proposta, parece que o seguinte paso a estudar é ver se simplemente adiantar esta “vacinación” antes de dar o inhibidor do punto de control [o outro tipo de inmunoterapia utilizado] pode ser máis razoable e pode permitir mellores resultados clínicos que vacinar despois de administrar o anticorpo, como foi o caso”. De todos modos, Juan insiste en que é “unha importante achega para esta área”.
O catedrático de Inmunoloxía da Universidade de Navarra Ignacio Melero tamén valora positivamente o avance e resalta, en especial, a loxística do ensaio, á que considera “unha fazaña”. “Non só porque se levou enteiramente a termo durante a pandemia e mentres BioNtech centraba os seus esforzos na súa vacina contra o SARS-CoV-2, senón porque supón un prodixio da tecnoloxía que BioNtech e Roche son capaces de levar a cabo, identificando os antíxenos e producindo unha vacina de ARNm en só seis semanas”, sostén o investigador en declaracións recollidas polo SMC España. Coincide con Juan no inconveniente: o número limitado de pacientes. Pero lanza igualmente unha mensaxe positiva: “A evidencia de que as vacinas ARNm de neoantíxenos funcionan é moi sólida neste ensaio tras a cirurxía”, conclúe.