Un probiótico podería solucionar a reprodución do linguado de acuicultura

A cría en catividade orixina disfuncións nos machos, pero un estudo con microorganismos derivados do ácido láctico busca poñer fin a esta eiva

Exemplares de linguado nas instalacións da planta de cultivos do IEO en Santander.

No último ano, un equipo do Instituto Español de Oceanografía (IEO) levou a cabo o proxecto PROBISOLE co obxectivo de investigar como a inxesta prolongada de probióticos pode optimizar o cultivo e reprodución do linguado senegalés, unha especie de elevado interese comercial na acuicultura nacional.

A hipótese de partida do proxecto apoiouse en estudos preliminares realizados no Centro Oceanográfico de Santander co pez cebra. Neles, o equipo puido recoller evidencias sobre o impacto positivo que a inxesta prologada de probióticos ten en parámetros reprodutivos.

En concreto, o linguado senegalés presenta unha disfunción reprodutiva nos machos nados e criados en catividade, polo que son incapaces de reproducirse de forma natural nas instalacións de acuicultura.

Ácido láctico

Para poder levar a cabo esta investigación foi necesaria a colaboración entre o persoal científico do IEO de Santander e de Murcia, así como con algúns investigadores das universidades de León e Deusto. O obxectivo era determinar o efecto que unha bacteria probiótica do ácido láctico pode ter no primeiro ano de vida dos exemplares de linguado.

A bacteria xa foi aprobada pola EFSA

Os probióticos poden definirse como microorganismos vivos que, inxeridos na cantidade axeitada, poden exercer efectos beneficiosos na saúde do individuo, neste caso, o linguado senegalés. Para esta investigación, o equipo utilizou unha cepa de Pediococcus acidilactici, aprobada para o su uso en acuicultura pola Autoridade Europea de Seguridade Alimentaria (EFSA).

Deste xeito, ao estar xa aprobado o seu uso, as conclusións poderían ser trasladadas directamente ás instalacións de produción do linguado, que segundo apuntan os científicos só en España suporía unha produción de máis de 1.000 toneladas.

Monitorización

Durante o desenvolvemento do proxecto, os investigadores combinaron experimentos baseados en bioloxía celular e molecular, histoloxía e biometría para obter as súas conclusións. En concreto, monitorizaron o desenvolvemento das gónadas nos exemplares alimentados co probiótico para comparalo co de outros alimentados con dietas estándar.

Por outra banda, os investigadores tamén prestaron especial atención ao estudo de xenes clave no desenvolvemento gonadal, crecemento, resposta inmune e metabolismo de hormonas esteroides.

Os resultados obtidos durante o proxecto foron presentados no Congreso Europeo de Acuicultura 2021, o principal evento científico enfocado neste sector en Europa. Ademais, o proxecto contou co apoio da Fundación Biodiversidade do Ministerio para a Transición Ecolóxica a través do programa Pleamar.

DEIXAR UNHA RESPOSTA

Please enter your comment!
POLÍTICA DE COMENTARIOS:

GCiencia non publicará comentarios ofensivos, que non sexan respectuosos ou que conteñan expresións discriminatorias, difamatorias ou contrarias á lexislación vixente.

GCiencia no publicará comentarios ofensivos, que no sean respetuosos o que contentan expresiones discriminatorias, difamatorias o contrarias a la ley existente.

Please enter your name here

Este sitio emprega Akismet para reducir o spam. Aprende como se procesan os datos dos teus comentarios.