Galicia lidera un estudo internacional para mellorar a eficacia da inmunoterapia en pacientes con cancro de pulmón. O proxecto está dirixido lo doutor Ángel Díaz-Lagares, do Complexo Hospitalario Universitario de Santiago (CHUS) e investigador da área de Cancro do Centro de Investigación Biomédica en Rede (CIBER). O traballo nomeado como Epilunar empregará a biopsia líquida, biomarcadores epixenéticos e a intelixencia artificial.
O cancro de pulmón é unha das principais causas de morte por esta patoloxía no mundo. A inmunoterapia supuxo un avance revolucionario para o tratamento desta enfermidade, pero non todos os pacientes responden de maneira eficaz a este tipo de terapia. O proxecto internacional liderado por Galicia busca solucionar este problema identificando con precisión, e de maneira non invasora, que pacientes beneficiaranse realmente deste tratamento, aumentando así a súa eficacia e reducindo efectos secundarios innecesarios.
Para iso, empregarase a biopsia líquida, unha técnica non invasora que permite analizar o ADN e as células tumorais presentes no sangue dos pacientes. Co apoio da intelixencia artificial, os investigadores poderán detectar en sangue os biomarcadores epixenéticos clave para predicir a resposta dos pacientes con cancro de pulmón á inmunoterapia.
250 pacientes en España
No estudo analizaranse mostras de sangue duns 250 pacientes con cancro de pulmón non microcítico avanzado, recrutados en catro hospitais españois: Complexo Hospitalario Universitario de Santiago (CHUS), Clínica Universidade de Navarra (CUN), Hospital Xeral de Valencia (HGUV) e Hospital Universitario 12 de Octubre de Madrid.
“O obxectivo é descifrar as claves para optimizar a inmunoterapia no cancro de pulmón, facéndoa máis personalizada e efectiva, co fin de mellorar significativamente a calidade de vida dos pacientes”, afirma o doutor Díaz-Lagares.
“Desexo mostrar o meu máis sincero agradecemento ao Instituto de Saúde Carlos III (ISCIII) e á Asociación Española Contra o Cancro. Por suposto, aos pacientes e aos seus familiares e a todas aquelas persoas e institucións que co seu compromiso e xenerosidade fan posible que podamos levar a cabo o proxecto. Isto permite que poidamos avanzar cara a un uso máis personalizado e eficaz da inmunoterapia no cancro de pulmón”, expresa Díaz-Lagares. O doutor tamén é investigador da Unidade de Epixenómica e do grupo de Oncoloxía Médica Traslacional (ONCOMET) do Instituto de Investigación Sanitaria de Santiago (IDIS).
O proxecto Epilunar foi financiado con preto de 1,2 millóns de euros, a través do apoio europeo TRANSCAN 3 – JTC 2023, que conta coa participación de varios organismos financieiros internacionais e nacionais, entre os que se atopan a Asociación Española Contra o Cancro e o Instituto de Saúde Carlos III (ISCIII).
