Investigadoras da Universidade de Vigo veñen de realizar un estudo no que demostran que as sementes e o aceite da mostaza branca (Sinapis alba) constitúen “fontes naturais de compostos bioactivos con propiedades beneficiosas para a saúde, que poderían ser empregadas en aplicacións alimentarias e farmacéuticas”. Ademais, nel afondan en como a introdución desta especie no agro galego pode ter vantaxes para a mellora das propiedades do solo, impulsando a agricultura ecolóxica.
O estudo Mostaza máis ca un mollo. Compostos bioactivos e a súa repercusión na saúde estivo dirixido polas investigadoras da UVigo María Figueiredo, do grupo Food and Health Omics, e Alicia Paz, do grupo de BiotecnIA.
As responsables do estudo lembran que o emprego de plantas medicinais como terapia complementaria ou alternativa é frecuente en todo o mundo e que en Galicia o uso destas herbas sempre estivo arraigado na cultura popular. “Aínda que a eficacia destas herbas non está cientificamente probada en moitos casos, os seus compoñentes químicos poden inducir respostas beneficiosas, ofrecendo pistas para o descubrimento de medicamentos eficaces”, afirman. Neste contexto, a mostaza “é unha destas plantas, utilizada tradicionalmente como condimento, conservante e na medicina popular para tratar enfermidades como as cardiovasculares e a diabetes mellitus”.
Alto contido en lípidos e compostos fenólicos
Neste contexto, as investigadoras da UVigo levaron a cabo este estudo para analizar a composición química das sementes de mostaza e do seu aceite, centrándose especialmente na identificación dos compostos fenólicos presentes, para así avaliar a súa actividade neuroprotectora e investigar a posibilidade de obter novos compostos antimicrobianos. O obxectivo último foi o de proporcionar información valiosa sobre o uso potencial da mostaza na industria alimentaria e farmacéutica. A investigación iniciouse co cultivo e recollida das sementes da planta no propio campus de Ourense. Ante a falta de referencias sobre esta especie, levouse a cabo unha caracterización completa da planta e das sementes, seguindo coa extracción do aceite de Sinapis alba e a súa análise.
Entre os resultados acadados, as investigadoras destacan que no caso das sementes revelouse “un alto contido de lípidos, superando as expectativas nutricionais comerciais, cunha composición elevada de ácidos graxos, especialmente oleico, linoleico e araquidónico, o que ofrece beneficios para a saúde grazas á presenza dos ácidos omega 6 e omega 9”.
Ademais, engaden que a semente e o aceite amosaron concentracións elevadas de compostos pertencentes ás familias químicas dos ácidos fenólicos e en menor cantidade dos compostos flavonoides. “Estes extractos ricos en compostos fenólicos mostraron actividade neuroprotectora ao inhibir as enzimas colinesterasas relacionadas coa enfermidade do alzhéimer, así coma actividade antimicrobiana contra os patóxenos Staphylococcus aureus e Candida albicans”, afirman.
Podes ler a noticia completa do DUVI na seguinte ligazón.
