Identificada unha nova diana terapéutica que podería frear o alzhéimer

Unha investigadora española lidera un estudo preclínico que consegue diminuír a cantidade de proteínas tóxicas no cerebro

Unha investigadora da Universidade de Málaga lidera o equipo responsable do achado en alzhéimer.
Unha investigadora da Universidade de Málaga lidera o equipo responsable do achado en alzhéimer.

Un novo estudo liderado por Inés Moreno, investigadora da Universidade de Málaga (UMA), en colaboración coa Universidade de Texas, identificou unha posible terapia non invasiva que podería frear a enfermidade de alzhéimer, a maior forma de demencia entre a poboación anciá, que hoxe 21 de setembro, celebra o seu Día Mundial, unha efeméride proclamada pola Organización Mundial da Saúde (OMS).

Moreno conseguiu reducir nun modelo preclínico a cantidade de proteínas tóxicas no cerebro –cuxa agregación é o principal motivo de morte neuronal no alzhéimer– ata nun 40%-80%.

Estas proteínas tamén se atopan no sangue e, segundo sinala a experta da UMA, están en equilibrio co cerebro: se aumenta no cerebro, aumenta en sangue e viceversa. A partir destes resultados, a científica propón a eliminación dos agregados tóxicos como diana terapéutica ante a enfermidade. O traballo foi publicado na revista científica do grupo Nature Molecular Psychiatry.

“Eliminar as proteínas tóxicas do cerebro é o obxectivo da maioría das terapias actuais fronte ao alzhéimer”, explica a investigadora do grupo da UMA NeuroAD.

Reducir as toxinas no sangue

A novidade desta investigación é que expón reducir as toxinas desde o sangue, onde tamén están. “Constatamos que, se quitamos toxinas do sangue, estas drenarían do cerebro ao sangue de novo en busca do equilibro, mellorando os signos clínicos e a patoloxía da enfermidade”, asegura Moreno.

A científica afirma que, actualmente, a análise de mostras sanguíneas xa se emprega, nalgunhas ocasións, para o diagnóstico da enfermidade como alternativa á neuroimaxe. Con todo, ata o momento, nunca se utilizou co fin demostrado neste traballo. Por iso, este novo uso “abre a porta a posibles estratexias terapéuticas non invasivas, que actúen a nivel circulatorio”.

O novo uso proposto podería converterse nunha estratexia terapéutica non invasiva que actuase a nivel circulatorio

Así, os resultados probados en modelos animais evidenciaron que este tratamento melloraría a capacidade de memoria e aprendizaxe, corrixindo fallos cognitivos, podendo non só eliminar as proteínas tóxicas, tamén modificar outros factores importantes no desenvolvemento da enfermidade.

A Universidade de Texas, onde Inés Moreno é profesora asociada, vai continuar con este estudo a nivel clínico, en busca de determinar os mecanismos moleculares implicados nesta mellora da enfermidade e, tamén, se o tratamento funcionaría en pacientes realizando, por exemplo, diálises aos pacientes con demencia ou, mesmo, transfusións.


Referencia: Preventive and therapeutic reduction of amyloid deposition and behavioral impairments in a model of Alzheimer’s disease by whole blood exchange (Publicado en Molecular Psychiatry)

DEIXAR UNHA RESPOSTA

Please enter your comment!
POLÍTICA DE COMENTARIOS:

GCiencia non publicará comentarios ofensivos, que non sexan respectuosos ou que conteñan expresións discriminatorias, difamatorias ou contrarias á lexislación vixente.

GCiencia no publicará comentarios ofensivos, que no sean respetuosos o que contentan expresiones discriminatorias, difamatorias o contrarias a la ley existente.

Please enter your name here

Este sitio emprega Akismet para reducir o spam. Aprende como se procesan os datos dos teus comentarios.