Desde hai case dous anos, cando colapsou un muro do Estanque da Gruta, un grupo de veciños de Betanzos decidiu actuar para frear o deterioro que sofre o Parque do Pasatempo. O colapso, que obrigou a valar a zona para impedir o tránsito de persoas e que o deterioro continuase, foi o impulso necesario para constituír a Asociación de Amigos do Pasatempo, unha entidade disposta a salvar o emblema que construíu a comezos do século XX Juan García Naveira.
O parque, unha homenaxe ao coñecemento científico, ao progreso e á imaxinación, que mestura estilos e historias, onde moitos ven constantes referencias á masonería, pero tamén á natureza ou á mitoloxía clásica, e unhas figuras inspiradas, en moitos detalles, na arte francesa do século XIX, segue desprotexido e a mercé do vandalismo e o abandono, tal e como denuncia a entidade a través das redes.
(Arrastra o cursor para ver o antes e o despois)
Nos últimos días, un novo acto vandálico puxo no foco a situación do parque. Na mañá do domingo, segundo conta Jose Souto, de Amigos do Pasatempo, un dos membros da asociación Brigantium, que participa nas visitas guiadas ao parque, atopou cheo de pintadas o león colosal situado na parte alta do parque. A entidade presentou xa unha denuncia ante a Policía para investigar os feitos.
Segundo explica Jose Souto, un dos problemas do Pasatempo, que se evidencia nos datos sufridos polo león, é “a falta de vixilancia e mantemento”, xa que os operarios municipais só acoden a abrir e pechar o recinto, pero é fácil acceder a el desde o exterior debido ao deterioro dos muros que vedan o acceso.
Esta ausencia no control de acceso ao Parque provoca tamén situacións perigosas para as estruturas máis deterioradas, como a illa do Estanque do Retiro, en risco de colapso, e que adoita ser un lugar de posado para fotografías que despois se difunden nas redes sociais.
Rehabilitación e novos achados
Despois das reiteradas denuncias de abandono, na primeira metade de 2018 anunciáronse traballos de rehabilitación do parque, nos que colaboran o Concello de Betanzos, a Deputación da Coruña e a Xunta de Galicia. En marzo retomouse tamén o proceso para declarar o parque como Ben de Interese Cultural. Porén, o Pasatempo segue á espera das obras. Só se acometeron tarefas de limpeza, algunhas delas realizadas polos voluntarios de Amigos do Pasatempo.
Precisamente, nunha destas xornadas de limpeza, no extremo norte do Pasatempo, os voluntarios descubriron un mosaico cuberto ata ese momento pola maleza, o lixo e a auga estancada. Na obra, seis liñas de pedras alaranxadas conflúen nun elemento central de pedra escura. En catro dos ocos do hexágono aparecen tamén catro patos con cadansúa cor alaranxada, gris, vermella e branca.
