O Consello Xeral de Colexios Oficiais de Químicos de España concedeu o Premio á Excelencia Química 2021 á Compañía Española de Algas Marinas (Ceamsa), con sede na localidade do Porriño. A empresa, fundada en 1966 polo químico Ignacio Alzueta, é merecedora do galardón “por ter como acenos de identidade a innovación continua e o esmerado coidado do medio ambiente mariño”.
O pleno do Consello Xeral, que adoptou o acordo o pasado 8 de novembro, destaca tamén que Ceamsa é hoxe líder mundial no seu sector e que conta cun persoal de 340 persoas, “multicultural, moi nova e con máis do 20% do seu persoal formado por químicos e enxeñeiros químicos”.
O decano do Consello Xeral de Colexios Oficiais de Químicos de España, Antonio Macho Senra, felicitou á compañía galega e apuntoua que a “é un exemplo a seguir” na industria química pola súa aposta “polo desenvolvemento de tecnoloxía punta, polo esmerado coidado da contorna no que desenvolve a súa actividade, neste caso os océanos, e pola súa aposta pola química e o seu compromiso cos profesionais da química”.
“A empresa é un exemplo a seguir pola súa aposta polo desenvolvemento de tecnoloxía punta e o coidado dos océanos”
A Compañía Española de Algas Marinas traballa na produción, desenvolvemento e distribución mundial de hidrocoloides naturais. Actualmente, na súa fábrica do Porriño, produce carrexenina, pectina, fibra, alxinato e goma de algarrobo refinada. Estes produtos utilízanse como estabilizantes, xelificantes, espesantes e texturizantes. China é o principal país produtor de carraxenato, co 17% da cota de mercado. Ceamsa, como empresa, ten o 14% da cota total dese mercado no mundo.
Promover e difundir a química
O Consello Xeral de Colexios de Químicos de España, no seu afán de promover e difundir a relevancia da química así como o seu beneficio social e económico, concede e entrega cada ano o Premio á Excelencia Química. O galardón recoñece os méritos relevantes no ámbito corporativo, profesional, social ou de xestión de persoas físicas ou persoas xurídicas.
Os galardoados con este premio até agora foron Juan Sancho Rof (2011), María Tarsy Carballas (2012), Industrias Químicas del Ebro (2013), Margarita Salgas (2014), Vicente Gotor (2015), Sebastián Delgado (2016), Grupo Técnicas Reunidas (2017), Rosa Menéndez (2018) e Juan Ramón González Velasco (2020).
A entrega do Premio á Excelencia Química 2021 aos representantes da Compañía Española de Algas Marinas será na cidade de Vigo, nun lugar por determinar, a mediados do mes de novembro, coincidindo coa festividade de San Alberto Magno, patrón dos profesionais da química.
