A maioría dos pequenos sismos que acontecen case a diario en Galicia non son percibidos pola poboación. Porén, si se sentiu o que na noite deste mércores se produciu en Ordes, ao nordeste do casco urbano do municipio, arredor das 22.51 horas.
O terremoto de Ordes, de magnitude 2,5, tivo epicentro a uns 16 quilómetros de profundidade. E segundo os datos recollidos polo IGN, sentiuse no lugar de Guiliade, en Betanzos, a máis de 20 quilómetros do epicentro. Porén, rexistrouse con intensidade II, é dicir, que é sentido por unha porcentaxe moi pequena da poboación e que non produce ningún efecto nin dano.
Un impacto inferior, por exemplo, ao que produciu o sismo de Melgaço, o pasado mes de novembro, que rexistrou máis de 400 avisos ao IGN, desde todo o sur de Galicia e norte de Portugal, e acadou magnitude 3,8.
Intensidade 2,5 é tremor, non terremoto. Dívolo unha galega que vive no cinto de fogo do Pacífico e á que lle tocou vivir un terremoto, en 2016, e varios tremores, o último este sábado, de 7,5. Mesmo que sexa de 7,5, non se considera terremoto se non hai danos graves.