Son masas de vapor de auga contidas na atmosfera, de varios quilómetros de longo e uns poucos centos de quilómetros de ancho, e que viaxan polo atlántico norte conectando as latitudes tropicais coa costa atlántica europea. Esta é unha hipotética definición dos ríos atmosféricos (RA), estruturas naturais de grande importancia para a climatoloxía xa que pola gran cantidade de humidade que transportan poden asociarse a precipitacións importantes.
O equipo dos investigadores do Grupo de Física Non Lineal Vicente Pérez Muñuzuri e Gonzalo Míguez Macho, nun artigo publicado na revista Chaos , propoñen unha forma novidosa de tratar os ríos atmosféricos e mostran como a propia estrutura dos RA así como a súa forma filamentosa tan característica poden explicarse mediante a descrición matemática das Estruturas Lagrangianas Coherentes, presentes na propia dinámica do vento e que se encargan de conter e transportar o vapor de auga. Estas estruturas permiten definir patróns de comportamento e serven como unha especie de andamiaxe temporal arredor do que un río atmosférico pode crecer e alongarse.
O estudo, en colaboración con MeteoGalicia, acadou gran impacto internacional
Os investigadores explican que as novas propostas que propoñen permitirán mellorar a definición existentes sobre os RA e por extensión “os sistemas de predición e alerta meteorolóxica reducindo danos materiais e o risco para as vidas das persoas durante os eventos de precipitación extrema”. Na actualidade, os investigadores traballan na descrición cuantitativa deste ríos de xeito que se poida establecer cun marxe mínimo de erro o seu impacto.
Vicente Pérez Muñuzuri e Gonzalo Míguez Macho colaboran dende hai un ano con MeteoGalicia na creación dun sistema de detección e predición de ríos atmosféricos que permita mellorar a calidade das alertas meteorolóxicas sobre Galicia. Este sistema atópase actualmente en fase de probas e forma parte dun proxecto financiado polo Ministerio de Economía e Competitividade. Como explican os investigadores, o servizo meteorolóxico galego recibe puntualmente as predicións da chegada de ríos atmosféricos ás costas detectados dende os sistemas da. Na actualidade, iniciáronse conversas con outras axencias meteorolóxicas nacionais e portuguesas para presentarlles o produto.
O novo artigo dos investigadores da USC xa foi citado en Science Daily, e American Institute of Physics, recoñecendo o xeito novidoso de tratar estes sistemas.
