Premiar o talento e a motivación. Esa é unha das premisas das que parte o Premio Talento Mozo Galicia, que acaba de sumar un novo nome á súa nómina de galardoados. Neste 2021, a distinción recíbea a investigadora postdoutoral Natalia Barreiro, que traballa actualmente no Centro Singular de Investigación en Química Biolóxica e Materiais Moleculares da USC (CiQUS). A Dirección Xeral de Xuventude, Participación e Voluntariado da Xunta de Galicia, que entrega o premio, recoñece a “traxectoria excelente” da investigadora no campo da viroloxía molecular.
Máis polo miúdo, o traballo de Barreiro estivo centrado no desenvolvemento dunha vacina contra o SARS-CoV-2 empregando un sistema de etiquetaxe molecular (IC- Tagging) desenvolvido integramente no grupo que dirixe o profesor José Manuel Martínez Costas. Con este sistema “somos capaces de producir microesferas proteicas en diferentes sistemas de expresión e produción de proteínas nas que podemos cargar proteínas de interese do SARS-CoV-2, o que nos permite obter un candidato de vacina de tipo subunitario”, segundo explica Natalia.
Recoñecer o esforzo
Así o declara en relación ao desenvolvemento dun sistema que podería permitir a produción de vacinas de maneira máis rápida e económica. “Este premio é unha forma de recoñecer o esforzo que se fixo e se continúa a facer no desenvolvemento da vacina no laboratorio, ademais de que sempre fai ilusión que che concedan un premio polo teu traballo”, engade.
O Premio Talento Mozo busca recoñecer as mellores iniciativas da mocidade en Galicia, outorgando visibilidade ao seu talento para que sirva de referente ao conxunto da sociedade. Outras catro persoas foron premiadas xunto a Natalia Barreiro en distintas modalidades: rural, deporte, empresa, cultura e creación. Ademais da distinción honorífica, todos eles recibirán unha dotación de 5.000 euros.
José Martínez: “Temos un sistema para buscar a vacina que ninguén máis ten”
