O proxecto de divulgación cientifica de Ceos Galegos organiza o primeiro concurso de astrofotografía de meteoros das perseidas en Galicia. Aproveitando o tirón popular das “bágoas de San Lourenzo” e tamén a calidade da astrofotografía galega, puxeron en marcha esta iniciativa que se resolverá o vindeiro luns.
O primeiro premio será para a imaxe seleccionada polo xurado composto por Salvador X. Bará e Jorge Mira. Ambos os dous son profesores da Universidade de Santiago de Compostela e veñen de editar o libro “Na procura da noite”, centrado precisamente na astrofotografía.
O premio popular será dado en función dos visitantes da web do concurso, onde se recollen as 8 imaxes excepcionais recibidas, todas moi diferentes entre si, de 6 autores galegos. As votacións pecharanse o domingo 9 de setembro ás 24.00 horas.
www.ceosgalegos.com xurdiu en decembro de 2017 como un proxecto de divulgación científica e astronómica ao través da fotografía. Ata o de agora leva publicadas máis de 100 imaxes cos seus respectivos textos explicativos e didácticos, enviadas por 30 fotógrafos diferentes.
Aquí podes visitar e votar
no concurso de Ceos Galegos
