O pasado 22 de xuño, despois de 95 anos nun estado latente, o volcán Raikoke entrou en erupción. Este cono situado nas Illas Kuriles, un arquipélago que se estende entre a península rusa de Kamchatka e o norte de Xapón, comezou a expulsar un penacho de cinzas e gases a centos de metros de altitude. Pouco a pouco estes materiais volcánicos tomaron altura, e chegaron a ser visibles desde a Estación Espacial Internacional. Os materiais expulsados polo volcán chegaron a acadar, segundo os cálculos do satélite Calipso, uns 17 quilómetros de altura.
Desde os 400 quilómetros sobre a superficie do planeta nos que orbita a Estación, os astronautas captaron estas abraiantes imaxes. Como curiosidade, a fotografía realizouse só dous días antes do regreso á terra dos tripulantes Anne McClain, Oleg Kononenko e David Saint-Jacques. Na actualidade fican a bordo Christina Koch, Aleksey Ovchinin e Nick Hague, aos que se unirán en xullo Aleksander Skvortsov, Luca Parmitano e Drew Morgan.
Do mesmo xeito, varios satélites tamén retrataron a nube de cinzas e gases. Así, o sistema MODIS do satélite Terra, da NASA; retratou a nube desprazándose cara ao leste, empurrada por unha tormenta. O mesmo sistema tamén captara en marzo deste ano o incendio de Rianxo e Dodro.
Despois dun incremento inicial da actividade, que incluíu varias explosións, a actividade do Raikoke foi diminuíndo e a nube foise espallando cara ao Pacífico. Unha nube que, segundo advertiron as autoridades e centros de investigación, podería ser perigosa para as aeronaves, xa que contén fragmentos afiados de rochas e vidros do volcán.
Por outra banda, outros sistemas, como o satélite Goes West da axencia estadounidense NOAA rexistraron con gran detalle como a nube do volcán Raikoke se foi mesturando coa tormenta, alcanzando unha superficie importante do Pacífico norte.
