O 19 de setembro abriuse, despois de 50 anos sen producirse erupcións, un novo volcán en terra firme nas Illas Canarias, tamén na illa de La Palma. E está a ser, aínda que afortunadamente aínda non causou vítimas mortais, o máis destrutivo en termos materiais nas erupcións históricas das que se ten coñecemento no arquipélago. Desde aquel día, case 1.000 hectáreas de terreo e máis de 2.000 edificacións e explotacións agrícolas quedaron cubertas polas miles de toneladas de lava que abrollan, case sen tregua, desde o volcán de Cumbre Vieja.
É un fenómeno sen precedentes, sobre todo, porque é o primeiro que se produce nas Canarias na era das telecomunicacións. Un gran dispositivo de investigación e seguimento do proceso, acompañado por enormes recursos técnicos, está a cartografar con gran detalle a erupción. Neste vídeo contamos algunhas das claves da erupción.
