Un proxecto con participación galega estuda os efectos na saúde da erupción da Palma

O profesor da USC Alberto Ruano liderado o estudo, que se centra no impacto que o suceso está a ter en 2.000 persoas e durante os próximos cinco anos

Imaxe de arquivo da erupción na Palma. FOTO: Pixabay

A Sociedade Española de Pneumoloxía e Cirurxía Torácica (SEPAR) anunciou o pasado luns 6 de xuño a posta en marcha do estudo sobre os efectos dunha erupción volcánica na saúde humana, xa que analizará o impacto da erupción de Cumbre Vieja, na Palma. O estudo estará dirixido polo profesor da Universidade de Santiago de Compostela (USCAlberto Ruano e centrarase no impacto que este suceso está a ter na saúde de máis de 2.000 persoas da illa durante os próximos cinco anos. O proxecto ASHES —palabra que en inglés quere dicir cinzas e cuxo título completo é ‘Análise da exposición e os efectos sobre a saúde respiratoria da erupción  volcánica en Canarias’— foi presentado no marco do 55 Congreso SEPAR, que se celebra estes días en Pamplona.

“O proxecto ASHES alberga tres grandes obxectivos relacionados coa saúde respiratoria da poboación exposta á erupción volcánica da Palma que requirirá a realización de tres estudos para determinar que impacto ocasionou sobre a poboación adulta, a poboación infantil e sobre pacientes respiratorios nun estudo de cohortes que terá un seguimento a cinco anos”, explica o profesor Ruano, investigador principal do estudo, membro de SEPAR, e catedrático de Medicina Preventiva e Saúde Pública da USC, cunha dilatada experiencia en epidemioloxía ambiental.

O estudo constituíuse por un grupo de expertos interdiciplinario

Para poñer en funcionamento o estudo, constituíuse un grupo de expertos interdisciplinario con profesionais que posuísen experiencia investigadora nas diferentes facetas das enfermidades respiratorias, deseño de estudos epidemiolóxicos e na análise de compostos tóxicos volátiles. O grupo conta con 20 profesionais especialistas en enfermidade pulmonar obstrutiva crónica (EPOC), asma, patoloxía intersticial, enfermidades ocupacionais e ambientais, ademais de epidemiólogos e coa colaboración do Centro Nacional de Sanidade Ambiental. Ademais, deseñouse un protocolo de investigación que foi aprobado polo Comité Ético de Investigación Clínica de Tenerife en febreiro deste ano, “tras celebrar varias reunións telemáticas nun tempo récord”, lembra o profesor Ruano.

Acordouse tamén que os investigadores principais deste estudo fosen o profesor Alberto  Ruano Raviña, xunto coa doutora Valle Velasco, neumóloga pediátrica do Hospital Universitario de Canarias-Tenerife; e David Díaz Pérez, enfermeiro especialista en patoloxía respiratoria do Hospital Universitario Nosa Señora da Candelaria e coordinador da área de enfermería respiratoria de SEPAR.

Deseño e obxectivos do estudo

ASHES pretende incluír a máis de 2.000 participantes en total e ser un fito na análise dos efectos das erupcións volcánicas na poboación xeral, xa que será o máis ambicioso deseñado ata a data, tanto polo número de participantes como pola medición de parámetros e por tempo de seguimento, que será de cinco anos. Implicará a realización dun cuestionario a todas as persoas que integren o estudo, ás que tamén se someterá a probas de función respiratoria e á obtención de mostras biolóxicas para determinar marcadores de exposición aos produtos da erupción volcánica.

O catedrático da USC será o director desta ambiciosa investigación. Fonte: USC

Este estudo ten un deseño epidemiolóxico moi coidado e pretende formar catro grupos de investigación diferenciados: persoas moi expostas para o efecto da erupción volcánica, con dous subgrupos, persoas con acceso á zona de exclusión e persoas dedicadas profesionalmente á recollida de cinza  volcánica; poboación xeral que residiu na zona máis próxima á erupción, a cal será comparada con poboación que reside na zona da Illa da Palma máis afastada do territorio eruptivo; poboación pediátrica que residiu na zona máis próxima á erupción, comparada fronte a nenos residentes na zona máis afastada da zona eruptiva; e enfermos de patoloxía respiratoria como a EPOC, asma ou patoloxía  intersticial difusa, diagnosticados previamente á erupción  volcánica, nos que se comparará o efecto da devandita erupción cos seus valores clínicos antes da mesma.

Con este deseño, os investigadores deste proxecto consideran que “o estudo ASHES achegará un coñecemento científico moi valioso, xerando a mellor evidencia científica ata a data, sobre o efecto das erupcións na saúde humana e tamén sobre o tipo de medidas que se deberían adoptar baseándose no seu efecto ante posibles erupcións futuras”, conclúe o profesor Ruano.

DEIXAR UNHA RESPOSTA

Please enter your comment!
POLÍTICA DE COMENTARIOS:

GCiencia non publicará comentarios ofensivos, que non sexan respectuosos ou que conteñan expresións discriminatorias, difamatorias ou contrarias á lexislación vixente.

GCiencia no publicará comentarios ofensivos, que no sean respetuosos o que contentan expresiones discriminatorias, difamatorias o contrarias a la ley existente.

Please enter your name here

Este sitio emprega Akismet para reducir o spam. Aprende como se procesan os datos dos teus comentarios.