A Noitevella deixou mollada a toda Galicia. Inundacións, desbordamentos e crecidas de ríos e fervenzas, accidentes de tráfico foron algunhas das centos de incidencias que os servizos de emerxencia galegos rexistraron durantes as datas máis sinaladas do Nadal.
O novo ano estreouse con 11 provincias do noroeste peninsular en risco por vento, choivas e ondada polo paso dunha fronte atlántica que afectou sobre todo a Galicia e Asturias, segundo informou a Axencia Estatal de Meteoroloxía (AEMET). Galicia foi a máis afectada pola choiva con Lugo, Ourense e Pontevedra en situación de risco importante e A Coruña con aviso amarelo.
De feito, diversos lugares roldaron e superaron mesmo os 100 l/m2. É o caso dos municipios pontevedreses de Tui, que xa xhegaron aos 114,6 l/m2; Salvaterra aos 101,2 l/m2; Fornelos de Montes aos 89,6 l/m2; e Avión aos 86,9 l/m2.
Debido ao paso da fronte atlántica, os ceos estiveron nubrados e cubertos e houbo precipitacións no terzo oeste peninsular, máis intensas en Galicia ca en ningures. Segundo Meteogalicia, o vento acadou tamén importantes refachos, por exemplo, con máis de 170 km/h en Vimianzo (A Coruña).
