Unha espectacular bóla de lume sobrevoou a península ibérica na noite deste venres e puido ser vista por multitude de persoas xa que o fenómeno se produciu ás 22:10 horas, entrou sobrevoando a costa de Lugo ata Andalucía, e destacou pola súa gran duración: preto dun minuto cando o habitual é que dure uns poucos segundos.
A rocha procedente dun asteroide entrou na atmosfera terrestre a unha velocidade duns 61.000 quilómetros por hora, o que provocou que se volvese incandescente. A bóla iniciouse a unha altitude duns 85 quilómetros sobre a provincia de Lugo. Despois avanzou en dirección sueste, cruzando o país nunha traxectoria lixeiramente descendente e practicamente paralela ao chan. Continuou perdendo altitude lentamente ata chegar ao suroeste de Madrid, momento no que empezou a gañar altura progresivamente mentres seguía avanzando cara ao suroeste da Península Ibérica.
Finalmente a bóla de lume deixou de ser vista cando se atopaba a unha altitude duns 87 quilómetros sobre o mar Mediterráneo, fronte á costa de Almería. Nese punto, a rocha abandonou a atmosfera terrestre seguindo unha órbita lixeiramente diferente á que inicialmente seguía cando se cruzou coa Terra.
O episodio foi gravado polo Complexo Astronómico da Fita, situado en La Puebla de Almoradiel (Toledo), que conta cun detector da Rede de Bólidos e Meteoros do Suroeste de Europa (Rede SWEMN) que traballa no Proxecto SMART que ten como obxectivo monitorar continuamente o ceo para rexistrar e estudar o impacto contra a atmosfera terrestre de rochas procedentes de distintos obxectos do Sistema Solar.
Segundo o astrofísico José María Madiedo, investigador responsable do Proxecto SMART, o fenómeno rexistrado na noite do venres coñécese como “bólido rozador“: bóla de lume que se xera cando unha rocha entra na atmosfera de forma case tanxencial, seguindo unha traxectoria practicamente paralela ao chan.
