Os raios crepusculares, entendidos entendido dende a óptica atmosférica, preséntanse como raios de luz que se colan polas aberturas das nubes, en especial dos estratocúmulos (Stratocumulus; formacións nubosas baixas), cando o sol está preto do horizonte. Así se poden observar nunha publicación que MeteoGalicia compartiu no seu perfil de X tras captar o fenómeno dende unha cámara web en Sálvora.
Este fenómeno baséase, pois, en columnas iluminadas que crean a ilusión de separar zonas de luz —por onde se filtra o sol— e zonas de escuridade —sombra creada polas nubes ou outros obxectos que impiden o paso dos raios solares—. Este fenómeno vólvese especialmente perceptible no amencer e no solpor, por propiciar estes momentos o maior contraste entre luces e sombras.
