Saen á luz as primeiras imaxes dunha das lúas de Marte, chamada Deimos. Foi capturada pola Misión de Marte dos Emiratos (EMM), tamén chamada Hope Mars Mission, e os expertos alegan a partir das fotografías que Deimos formouse á vez que Marte, descartando a teoría de que fose un asteroide que entrou na órbita do planeta. Cando chegaron as primeiras capturas desta lúa de 12,4 quilómetros de ancho, o equipo quedou sorprendido. A líder científica de EMM, Hessa Al Matroushi, comentou emocionada tras a primeira transmisión: “Marte estaba no fondo, e iso foi alucinante, honestamente”. Na reunión da Unión Europea de Xeociencias celebrada o pasado luns 24 de abril, informou dos resultados.
Hope realizou o seu primer sobrevoo en Deimos o pasado 10 de marzo, a tan só 100 quilómetros da superficie. Hope posúe unha gran órbita que alcanza máis de 40.000 quilómetros por enriba de Marte, explicou Al Matroushi, que pertence ao Centro Espacial Mohammed Bin Rashid en Dubai. De maneira que se puido observar a Deimos dende o seu lado afastado. O espectro relativamente plano que os científicos identificaron suxire que esta lúa parece estar composta por regolito de gran fino, material que se aprecia na superficie de Marte, e non rocha rica en carbono que normalmente se atopa nos asteroides. “Se houbese carbono ou orgánicos, veriamos picos en lonxitudes de onda específicas”, explica Al Mastroushi.
A nave espacial de 1,35 toneladas e 200 millóns de dólares lanzouse nun foguete xaponés en xullo de 2020 e chegou a Marte en febreiro de 2021. O seu principal obxectivo era estudar as variacións estacionais na atmosfera do planeta e os patróns climáticos. Unha vez que isto rematou, o equipo enviou os propulsores para cruzarse coa órbita de Deimos. “Non queremos obter unha observación única de Deimos”, di Al Matroushi, “sabiamos que queriamos máis”. A misión non pode visitar o outro satélite natural de Marte, Fobos, que rodea o planeta a menos de 10.000 quilómetros da superficie, que está máis abaixo que o punto máis baixo da órbita da sonda.
