Primeira imaxe en alta definición e panorámica 360 tomada polo róver Perseverance dende o planeta Marte. O róver da misión Mars 2020 da NASA, captou esta paisaxe desde o seu lugar de aterraxe no cráter Jezero.
A fotografía realizouse o pasado 21 de febreiro co instrumento Mastcam-Z, unha cámara situada no mastro ou ‘cabeza’ de Percy. Trátase da segunda panorámica tomada polo róver desde a súa chegada ao planeta, tras tomar outra fotografía similar o 20 de febreiro coas cámaras de navegación, de menor calidade.
O instrumento Mastcam-Z é un sistema dual de cámaras que permite facer zoom, tomar vídeos en alta definición, instantáneas panorámicas a cor e imaxes en 3D da superficie marciana. Con ela, o robot pode proporcionar detalles exhaustivos de obxectos distantes e próximos.
Estas cámaras axudarán ao equipo científico a avaliar a historia xeolóxica e as condicións atmosféricas do cráter Jezero, á vez que permitirá identificar rochas e sedimentos que necesitan unha avaliación máis precisa por outros instrumentos do róver.
