Martes 19 Marzo 2024

Piar de luz: o fascinante fenómeno captado no ceo do norte de Galicia

Era arredor da medianoite do venres ao sábado da pasada semana cando desde o alto da Curuxeira, no municipio lucense de Muras, apareceu algo estraño no ceo. Era un piar de luz, un raro fenómeno óptico que moi poucas veces se consegue inmortalizar. Alí estaban Marcos López e Sete Vázquez, dous fotógrafos que pertencen á sección de Astronomía da Sociedade Galega de Historia Natural. “Normalmente facemos fotografía nocturna e de ceo profundo na zona, pero cando as condicións non son boas aproveitamos para facer foto de paisaxe, e era o que estabamos facendo esa noite”, conta López.

Nesas estaban cando de súpeto apareceu un brillo estraño no ceo ao mirar cara a zona onde se vía a luz da vila das Pontes de García Rodríguez. “Comenteillo a Sete, e preparamos rapidamente os equipos para intentar captalo da mellor maneira posible”. O primeiro no que pensaron foi nunha pequena aurora boreal, “pero pareceunos moi difícil que puidera chegar a verse aquí”, e ademais estaba inmóbil no ceo. Durou uns 15 minutos.

Publicidade

Mentres comezaban a tomar imaxes, Sete e Marcos contactaron cun compañeiro tamén fotógrafo para constatar que aquilo que estaban vendo era, como sospeitaban, o fuxidío piar de luz que se ten captado en distintas partes do mundo cando as condicións da atmosfera son as axeitadas. E así foi.

Piar de luz captado en Muras. Fotografía: Sete Vázquez.
Piar de luz captado en Muras. Fotografía: Sete Vázquez.

O piar de luz

Para que teña lugar o fenómeno do piar de luz teñen que darse unhas circunstancias determinadas, segundo explica Marcos López. “Ten que haber aire particularmente frío en altura, e o ceo debe ter unha transparencia determinada”. Ademais, debe haber algo de contaminación luminosa, ese factor que tantas veces é inimigo da observación do ceo nocturno. Neste caso, foi a luz das Pontes a que fixo posible o feixe de luz.

En varias ocasións, a NASA escolleu o retrato do piar de luz como a súa foto astronómica do día. Na súa explicación, a axencia salienta que para ver este fenómeno, debe haber cristais de xeo no aire a unha altura relativamente baixa. Tal e como se pode ver neste esquema, os cristais actúan como unha especie de pantalla entre a fonte de luz e o observador.

Esquema do piar de luz. Fonte: Les Cowley / atoptics.co.uk.
Esquema do piar de luz. Fonte: Les Cowley / atoptics.co.uk.

Aínda que é habitual velo de noite, o piar de luz tamén pode xurdir durante o día, formado pola luz do sol. Os piares solares teñen, por tanto, unha xénese semellante. Ben por enriba ou ben por debaixo da luz solar, os cristais de xeo debuxan un fermoso feixe.

O fenómeno do piar de luz súmase así ao arquivo de imaxes nocturnas do ceo de Muras, un concello que aspira a obter a certificación Starlight pola boa calidade dos seus ceo.

 

DEIXAR UNHA RESPOSTA

Please enter your comment!
Please enter your name here

Este sitio emprega Akismet para reducir o spam. Aprende como se procesan os datos dos teus comentarios.

Relacionadas

LIA (2), pioneiros galegos no desenvolvemento da intelixencia artificial na astronomía

O grupo da UDC recibiu o Premio Spin-Off PuntoGal na edición 2023 pola súa traxectoria de éxito

Un novo exoplaneta desafía as teorías clásicas de formación planetaria

Un equipo de astronónomos descobre LHS 3154b, cunha masa similar a Neptuno, orbitando preto dunha estrela anana de moi baixa masa

Descubertos seis exoplanetas que ‘bailan’ de forma sincronizada arredor da súa estrela

Os planetas posúen unha configuración que apenas cambiou desde hai máis de mil millóns de anos

Begoña Vila: “Atoparemos probabilidades de vida noutro planeta”

Co gallo do décimo aniversario de Gciencia, a astrofísica da NASA analiza a divulgación dos achados cósmicos e a busca de vida intelixente