A constelación Starlink, unha rede de pequenos satélites artificiais da empresa SpaceX, propiedade do empresario Elon Musk, ten previsto establecer nos vindeiros anos unha rede de telecomunicacións composta por miles de aparellos que orbitarán a Terra. Desde a posta en marcha do proxecto, é posible ver no ceo nocturno, despois dos lanzamentos, uns sorprendentes trens de luces que chaman á atención de quen non está ao tanto do proxecto Starlink. Algo semellante pasou nos últimos meses en Galicia, e así o capturou o pasado 4 de xuño Alejandro, un afeccionado á astrofotografía que forma parte do Clube Compostelán de Astronomía Vega. A imaxe, tomada desde o Monte Pedroso arredor das 23.08 da noite, amosa o paso da constelación coincidindo coa lúa chea sobre a cidade de Santiago.
Paso del tren de satélites #Starlink 7 de @SpaceX por encima de Santiago de Compostela, el mismo día del lanzamiento. Si, con luna llena, porque sólo a mi se me ocurre 🙈 pic.twitter.com/MjlqjTVh2H
— aleixandrus (@aleixandrus) June 25, 2020
Explica Alejandro que é probable que os satélites non puideran verse naquel momento a ollo nu, debido á presenza da lúa e a contaminación luminosa da cidade. Porén, puido capturalos grazas á técnica que utilizou. “É unha técnica tendo a escurecer as fotografías durante a toma para poder ter detalle nas luces máis brillantes. A miña cámara permíteme recuperar moita información durante o procesado, polo que opto por traballar deste xeito”, conta.
Sobre o impacto da constelación Starlink na fotografía nocturna, Alejandro di que “eu persoalmente, que fago fotos de gran campo e Vía Láctea, non atopei problemas con estes satélites diferentes a calquera outro, xa que adoitan ser trazas moi febles, fáciles de eliminar no peor dos casos; pero si teño compañeiros aos que lle ocasionan problemas e coñecidos que usan telescopios que teñen que desbotar fotos de varios minutos de exposición por culpa deles. É un problema real que, a día de hoxe, non parece ter solución. Os ‘darksat’ cos que SpaceX está experimentando non parecen realmente máis escuros que os satélites normais”, apunta.
Desde o lanzamento de proxectos como os da constelación Starlink, numerosos investigadores e entidades de prestixio, como a Unión Astronómica Internacional, manifestaron a súa preocupación polo impacto que este tipo de iniciativas pode ter na observación do ceo nocturno e, por extensión, na investigación astronómica.
